曾經極度風光既 XBox 360 終於要退休啦！美國微軟集團周三宣布，將會停止生產10年前面世既電子遊戲主機 XBox 360。雖然仲有存貨，但係賣晒就無架啦。

而Xbox遊戲機系列負責人Phil Spencer 除咗感謝機迷對 XBox 360 同埋微軟既支持之外，佢同時都承諾 Xbox Live 既服務將會繼續支援 XBox 360 既用家，而 XBox 360 既硬件則仍然可以享有原廠提供既維修服務。而且微軟係後繼機 XBox One 加入向下兼容功能，可以係新機上面玩返 XBox 360 既遊戲(可惜唔係全部Game都得)，所以今次停產，對於想繼續玩 XBox 360 Game既朋友黎講，相信問唔會好大。

XBox 360 除咗有全球玩家累積遊戲時間達780億小時之外，全球累積銷量仲超過8000萬部，係美國銷量亦都完勝PS3！伴隨住我地既除咗3紅之外，仲有好乞人憎既1紅，2紅，然後要搵張被焗到佢變3紅既經驗。

雖然部機缺憾多多，但係當年微軟都好快速作出應變措施，斥資10億美元去更換3紅既主機，同時重新設計硬件，推出後繼機(即係黑機)，捱過危機之餘亦都贏得口碑。除咗服務之外，微軟提供極優質既網上服務亦都係當日賣點之一，直到今時今日以網絡連線質素黎講，依然係 XBox Live 佔優。(不過介面就好唔user friendly，呢方面PS就做得比較好啦)

而XBox 360亦都帶黎唔少影響，例如佢個手制堅係好鬼死好撳(PS原裝制我係玩到手指痛)，買機必送一個有線Headset啦，正式將線上對戰帶入全語音對話世代(而家PS4亦都一樣會送耳機一隻)，仲有呢隻單邊藍芽耳機真係好鬼死好用……我都買咗2隻。

當然佢亦都帶比我地好多好作品，《Gears of War》系列、《Forza Motorsport》、《Halo》系列、《Fable》系列等等，而且當日街霸4可以咁紅，XBox 提供優質連線對戰環境都係一個好重要因素黎，當日XBox 360 咁紅，見到而家 XBox One 個勢咁真係好令人唏噓，希望黎緊既將來爭氣，始終各家爭鳴對機迷先係有福！(好似已經無人記得仲有 Wii U？)