《Final Fantasy 7 Remake》：掩眼法來既啫，嚇我唔到既！
文長，涉及劇透，總結在最尾，想睇評分可直接跳到最後。
玩完《DOOM》，又玩《Resident Evil 3》，再玩完《Half Life》，之後竟然等緊《FF7》……如果有人真係時空旅行返來到今年，你唔同佢講話今年係爆武漢肺炎果年，你叫佢估，真係分分鐘估而家仲係九十年代。
首先要利申，我係未玩過原版《FF7》既人（當年得日文玩唔到），我係純粹將佢當作係一隻現代遊戲咁去評論，而唔會帶有作何品牌效應，同埋舊作 FANS 情意結。
用呢個來做前題既話，老實講《FF 7 Remake》對我來講觀感唔係太理想。成個遊戲既玩法係好既，但呢個好，係在於遊戲既平衡度同戰鬥設計等等方面。即係數值唔會太過難或易玩，每種裝備組合都有佢既功用，每個敵人或者 BOSS 都會有不同既強弱點同埋階段性打法，令到成件事加多左少少策略成份等等等等………
其實呢度已經集結左遊戲最後「好唔好玩」既大部份感想，你只能夠話係唔錯，但缺失既地方亦唔少。下面再講多少少遊戲其他既優缺點，集合埋就會知個分數係咩。
角色、特效、音樂
呢幾樣野係《FF7RE》入面整得比較好既部份。成隻遊戲對於呢幾部份既質量同其他既部份可以講得上係天淵之別。
首先角色當然唔洗講啦！唔單止 Cloud、Tifa、Aerith 甚至連「雪崩」果幾個成員，唔淨止樣貌、身形甚至乎係一應服飾係對話同埋過場動畫入面都可以話係一絲不苟。當然主角群三人既待遇最特殊既地方就係有不同既穿著啦！
跟住係特效，無論係普通招式，Limit 技定係召喚獸既召喚或者戰鬥，都自帶各式各樣目不暇給既動畫同埋特效，而且各個召喚獸既重新演繹更加係嘆為觀止，真係有帶比人震撼既感覺。
雖然我冇玩過原版，唔知佢有幾多首 OST 係原版重製既音樂，但無論如何個質素都係唔錯既。至少係戰鬥既過程（甚至係重試既過程中）我都未對個戰鬥音樂作出抗拒既反應。又唔係曠古爍今，不過算係咁啦！
戰鬥、畫面
咁簡單講完少少正常位，就係時候講扣分位。其中幾乎等同遊戲核心部份既戰鬥系統，做得真係好差。我唔會否認佢數值同埋敵人既設計的確冇太大既差錯，但係玩上手硬係覺得劣！
第一，當然係大家都 X 緊既「Lock-on system」。咁變左做一隻第三身既類似動作遊戲玩法，當然需要比玩家鎖定目標，如果唔係點知自己打緊乜？最惡搞既係，成個《FF7RE》既戰鬥，除左出召喚獸果一下之外，係永遠都唔會拉開個鏡頭！咁代表咩？敵人如果係巨型大過個 mon 既，你唔 zoom 遠啲，根本成場只係睇到佢隻腳！
呢個都唔係重點，因為好多動作 GAME 都係咁，但係當你想追住 LOCK 左果個部位去打，或者敵人逼到你埋牆角既話，你個視線永遠固定係同一個距離只會卡左個牆角，而你乜都做唔到。《Dark Souls》成日都係咁？係呀！所以咪隻隻都係缺點囉！唔通人地做你就要跟咩！
更嚴重既係敵人如果係飛行系既話，通常會飛高過你既視線範圍。一般見到呢啲情況，其他 Game 會對你個鏡頭 PAN 上天空等你追到個敵人。《FF7RE》就醒目啦！敵人飛得高過個鏡頭？幫你甩 lock 先！我真係好想問如果隻 Game 可以隨便幫我甩 lock 既話，咁我 lock 來係有咩意義呀！
跟住當然不得不提個閃避掣。我係完全唔知可以點用，真係慘過回合制。如果係回合制遊戲，今 turn 出迴避，咁起碼我知道佢係我個人物加埋裝備既迴避數值，再加迴避技能既數值，再去睇敵人既命中數值作比較，再隨機睇下我會唔會比人打中丫！
相反，如果係動作遊戲既，我會知道敵人既攻擊係幾時先為之真正有判定，因為動作遊戲係考反應，係睇下玩家可唔可以利用一個好短、但既定係政擊判定範圍，同時間作出閃避或者防反既反應。
所以動作遊戲例如《DMC》或者《MH》係會係閃避既時候加左無敵幀，玩家係做出閃避動作既時候應該有一段時間係無敵先啱。而作為一隻 RPG，例如《MH》咁，更加可以由裝備同裝備技能呢啲數值入面修改迴避性能，以加長閃避時既無敵時間，咁先係真正做出迴避向 Gameplay 丫嘛！
咁請問《FF7RE》做左邊樣？你係比人打既時候撳閃避，係唔會自己閃避左個攻擊，而且多數情況下，都會中敵人既目標性攻擊（即係普攻或者射擊）。你當佢係動作遊戲咩？你又唔見佢有無敵幀喎！更加唔會有個魔晶石係加強迴避性能咁。
當然啦！你更加冇可能知道敵人既攻擊幾時先係為之判定啦！我真係第一次見到一隻 GAME 個閃避又唔係考數值，又唔係考反應，總之你就係避唔到啦！咁我要來做乜 9 呀到底！唔通真係為左出閃避斬咩……….（編按：呢一句好好笑 LOL）
以上只係戰鬥方面既嚴重扣分位，其他算係可接受，要改善既地方。
戰鬥有三個角色，但控，就同一時間只可以控一個，其他果兩個人唔可以 set 戰鬥 AI（例如《Tales of》系列），連比個指令係「優先防禦」「優先攻擊」都冇，乜都要特登轉人去做，可謂零協調既戰場。
就算當你真係暫停左，用 ATB 出技，我都未曾見過有遊戲既 AI 係唔識出技落果個目標到。遠距離既攻擊尚好，近距離既技能例如叫 TIFA 用下壓踢去打隻怪既右手咁。如果你唔係控住 TIFA 走去佢既右手，先撳下壓踢既話，TIFA 係會係原地踢空氣………………WTF？
你有個目標，你出技，個 AI 連行過去都唔識只係可以原地出？！Really？？？
而且隊友如果唔手動控既話，好多場合之中根本係連普攻都唔識用，條 ATB 係萬年都冇一格既，即係無論你想定唔想，你都係要轉人先有技出，我…..我 DLLM 咩……
好喇，真係到出技喇！我就突然好莫名咁懷念《Mass Effect》，原來三條友只係需要幾個技能做 combo，已經可以做到好多組合！呢個 POINT 真係唔係話佢跟返原作係缺點來，但咁多現代遊戲都作出左自己既改進，點解你到今時今日重製都重係咁？
我玩《Xenoblade 2》既時候，人地又係三個人果個連技既組合，真係多到痴左線，我當你簡單啲，學下《Mass Effect》都好丫！
例如好簡單︰一個起 combo 技，一個完 combo 技。火打人燃燒，冰打人凍結，電打人麻痺，是為起 combo。英勇斬擊、下壓踢、爆彈射擊等等打擊系技能，可以導致有狀態既人狀態爆破，做成額外傷害，而且將狀態擴展出去，成件事會唔會有趣好多？
你可能會問，點解要搞咁多野呀？喂其實《FF7》咁樣，所有人都可以用所有屬性既魔法，又人人都有打擊系技能既，戰鬥如果唔係技能之間互有combo，咁其實你加多啲血比 cloud，佢一個人 solo 都得啦！前面有咩怪，咪插咩剋屬既魔法囉，一定唔會輸架喎！
除左個劇情需要，要隊友做乜啫？個 AI 寫到連普攻都唔識，入場除左比 BOSS 做沙包仲有咩用？就係因為每個人都只可以插有限數既魔晶石，先激發到玩家要去 combo 敵人做成最大傷害丫嘛，咁隊友先有存在價值架嘛，咁係故事以外係戰鬥之中，我先 feel 到佢真係朋友，唔係走來搞破壞架嘛！
跟住終於數到來畫面，點解個標題會話「掩眼法來既啫，嚇我唔到既」呢？因為 Square Enix 一早睇死左我地淨係會望住啲角色同技能特效，對於真正既畫面，係唔會有太大既敏感。
實際上，你只要仔細咁望一望，除左主角幾個人之外，成個世界幾乎所有野都係矇既！所有建築物，不論裏外，矇既！啲 NPC，矇既！TIFA 行遠少少，都係矇既！係過場，淨係見到幾個主角講野既時候，個人叫左見得清楚啲，但果陣個背景，都係矇既！
我個人好少用畫面來評論遊戲，都係果句，Budget 作怪啫。除非隻遊戲係用畫面來做賣點，或者佢個畫面係特別好或者特別…….差。以《FF7RE》既人物質素來做對比，佢地身後果啲背景，甚至係遠景既「靜態圖」個質素，實在相差得太遠，我真係冇辦法唔扣分。而且，同其他同級既遊戲比，甚至係幾年前既遊戲，甚至係開放世界遊戲比，都仲要差，點比分你呀！
至於故事因為佢都未完，而我又未玩過《FF7》原版，我先唔評論，遊戲得一條路既地圖設定，同時要不段行重覆既路去做 fetch quest 支線，呢啲係 RPG，尤其係 JRPG…預左架啦！我都冇乜所謂，係個故事明明咁少野講，係都要拖到 30 個鐘咁長氣左啲啫。
總結︰下次比心機
同樣係一隻四百幾蚊既遊戲，一拍埋落其他 RPG 度比。人地是但一樣長處，畫面，音樂，戰鬥，故事，開放世界，已經飛甩《FF7 RE》九條街。唔係話抵毀佢，反正你想像到既就用呢個質素出隻冇《FF》牌子既GAME，評論界就唔止係我今日插咁少野。下次比心機整返好先出啦！FANS 錢係易呃，但唔應該呃架！
+角色、特效、音樂
-戰鬥、畫面
最終評分︰70
VJGamer 歡迎讀者投稿 – 如蒙投稿，請將文稿、筆名、作者簡介及聯絡電話，電郵至 [email protected]。
人生如遊戲，我就係PETER，玩既係人生，唔會有個更好既名。
有時寫下評論，多數介紹下GAME。分享、批判遊戲。