好多時大家去估計一隻遊戲推出時間，都係以開發進度為參考數據。不過喺日本家用機遊戲喺正式推出市面前，都要做一個程序，就係「送檢」。因應武漢肺炎疫情，日本首相安倍晉三日前宣佈日本七個都道府縣進入緊急事態，而負責遊戲審查嘅機構 CERO 亦都逼於無奈，宣佈停工一個月。

日本遊戲審查機構 CERO 主要工作，係幫即將上市嘅遊戲進行年齡分級，如果無進行呢個分級的話遊戲係不能上市的。根據日前 CERO 嘅公告，將會由 4 月 8 日起停工一個月至 5 月 8 日為止。又因為審查員需要去遊戲廠商度作出審查，所以係無法以 Work Form Home 型式工作。

而喺日本不論 PS4、Xbox One 定係 Nintendo Switch ，要出 Game 就要比 CERO 審核，亦即係話 CERO 停工就會直接影響遊戲發售時間。一般黎講，會喺遊戲上市前兩三個月提交遊戲進行審核，原定喺 4 -5 月期間推出嘅遊戲應該就不受影響。但據了解已有廠商因為 CERO 停工而受影響，原定夏季推出嘅遊戲好大機會會受到影響。另外亦唔好天真到以為「日本出唔到咪出住港版先」，你真係覺得有可能？

咁我哋又再望下 6 – 9 月有咩注目大作，同埋現時嘅審查狀況。有妖精尾巴（CERO B級）、對馬戰鬼（審查予定）、MOBILE SUIT GUNDAM EXTREME VS. MAXIBOOST ON（CERO B級）、復仇者聯盟（審查予定）、Cyberpunk 2077（審查予定）、Mr. DRILLER Drilland（CERO A級）等等，至於會唔會搞到延期，喂我點知，你問鄰國幾時播完毒好過啦。