《Biohazard Re:3》推出一星期左右，雖然坊間評價好壞參半（我地嘅評測），不過銷售數字就一定唔會差得去邊。正常黎講，Capcom 呢啲大公司一定有遊戲開發路線圖，計劃定系列黎緊嘅方向。不過有時遊戲公司都會做下問卷，調查下玩家想要啲乜，例如之前 SEGA 都試過問「最想重啟嘅作品」，當時嘅第一位就係《櫻花大戰》，然後又真係出咗隻新櫻，今次就到 Capcom 問下大家想要乜啦。

問卷同平時大家做開果啲差唔多，都係問下你幾大、做咩類型職業、有無買《Biohazard Re:3》、覺得點樣之類。不過喺問卷後面出現二條問題，令人感到有點意外。呢二條問題分別係：

「如果《Biohazard》系列發售新的重製作品，請問您還會購買嗎？」
「如果《Biohazard》系列發售最新的正統續作，請問您還會購買嗎？」

喺呢二條問題入面，見到 Capcom 仍然想做新嘅《Biohazard》重製版，同時亦都無放棄推出新續作嘅念頭。留意喺呢二條入面，仲順便問埋玩家如果新作出喺新世代主機仲會唔會買，亦即係研究緊新作對應平台。

其實出完《Biohazard Re:3》之後，網上已經好多玩家討論緊黎緊會出邊隻重製版。暫時最高呼聲都係《Biohazard Code: Veronica》，不過大家亦都唔好忽略初代重製嘅可能性。《Biohazard》系列以外，當年嘅《Dino Crsis》（恐龍危機）亦都極受歡迎，如果用《RE》嘅方式重製相信都會大賣。另外早前亦有傳《Biohazard》正統續作（第八集）以及另一隻新嘅《Biohazard》遊戲正在開發中，不過就短期內都唔會見到住。

不論新一隻《Biohazard》係乜都好，只要質素有《Biohazard Re:2》嘅級數我就絕對接受。不過你問我最想重製邊代的話，我絕對會答你《Biohazard 7》。