武漢肺炎持續，遊戲廠商就繼續送 Game 令大家安在家中避難，今次就到手機平台送 Game。由 Square Enix Montreal 開發嘅《Lara Croft GO》現時喺 iOS 及 Android 雙平台正進行限時免費下載，而且呢隻遊戲曾奪得 2015 年 Apple Game of the Year iPhone 遊戲，真係快手拎咗先算！

《Lara Croft Go》係一隻回合制解謎遊戲，屬於盜墓者系列作品，遊戲基本玩法同製作團隊之前嘅作品《Hitman GO》類似。玩家於遊戲中操作蘿拉，利用道具、陷阱等等殺死敵人，以及解開謎題避開巨石等各種機關。遊戲現時有 7 章及超過 115 關，供玩家收集古代寶物，同解鎖蘿拉新裝。另外遊戲個名雖然有個 GO 字，不過同 PKM GO 係無關係的，唔好諗住落街捉蘿拉。

《Lara Croft Go》現時做緊免費下載，到 4 月 2 日為止，iOS 及 Android 版本同樣免費（其實 Steam 都有，不過無做免費）。

除咗《Lara Croft Go》做緊免費，2014 年 Apple Game of the Year 續集《紀念碑谷2》（Monument Vally 2）同樣做緊免費下載。呢隻遊戲玩家要操作一對母女，喺幾何建築嘅迷宮中找尋出路，屬解謎遊戲。作為續集顏色運用以及關卡設計更勝於前作，絕對係出色嘅作品。

《紀念碑谷2》同樣做緊免費下載，到 4 月 2 日為止，iOS 及 Android 版本同樣免費。