波蘭遊戲工作室 Layopi Games 於去年發售 PC 向動作遊戲《Devil’s Hunt》，仲雄心壯志地話會增加人手，目標係將遊戲登錄埋家用機市場；不過，事隔僅有半年，Layopi Games 嘅員工就向當地媒體 PPE 爆料，話公司無出糧，仲要靜靜雞執左笠。

根據呢位前員工於 3 月 4 日透露，Layopi Games 於 2 月份時，一切運作如常，員工一直為遊戲移植而勤奮工作（《Devil’s Hunt》 原定 2020 年頭登錄 PS4 及 XBox One）；只不過，實際上公司一直拖欠員工薪金，對上一次出糧，已經係 2019 年 11 月嘅事，仲要一份糧分三次出。換句話講，即係全部員工由 2019 年 12 月份開始就未有糧出。

員工曾於 1 月份時向公司追討欠薪，只係當時公司未有正面應對，而公司內部亦開始流傳資金不足嘅傳言。

《Devil’s Hunt》講述男主角受到惡魔力量侵蝕，佢為左平衡力量，所以陷入天使與惡魔嘅對抗當中；係一隻 Hack and Slash Game（破殺類遊戲）。

據說 Layopi Games 原本以為《Devil’s Hunt》會大賣，不過，遊戲推出之後，獲得唔少批評，包括遊戲欠缺原創性、處處帶有《Devil May Cry》嘅影子；就算以 Hack and Slash 遊戲黎講，劇本都未免太薄弱；玩法重複；以及畫面有不必要嘅性暴露等等意見，導致遊戲於外國評分網站 Metacritic 上只得到 47 分嘅低評分；而 Steam 平台上亦有一半評分用家給予遊戲差評。

《Devil’s Hunt》嘅劇本由 Layopi Games 嘅創立者 Paweł Leśniak 所撰寫，佢仲將劇本寫成小說《Equilibrium》；只係，回報不似如期，有理由相信係遊戲嘅各樣負評令到投資失利，加上經營不善，搞到公司陷入倒閉。

Layopi Games 嘅官方網站，已經失效，而 Paweł Leśniak 嘅 Email 亦已經停用，本人目前係潛水狀態；員工要追討薪金，似乎都相當有難度。

Layopi Games 公司喺無通知員工嘅情況之下關門大吉，仲將所有員工於公司內部嘅所有物品，全數丟到垃圾房；除此之外，電腦亦全部格式化，確保所有資料唔會外傳。

作為一個比公司拖糧、物品仲比人擅自處理嘅員工，嗰份忿怒，可想而之……。

希望呢件事公開左後，員工可以追討返佢地應有嘅回報；至於《Devil’s Hunt》呢隻遊戲，編輯部無緣玩過，到底又係唔係網上面講到咁不堪呢？歡迎大家分享！