之前有位新晉製作人，曾經口出狂言話「以前技術唔夠先會整戰棋遊戲，而家技術夠咪唔整囉」。以上呢番說話我哋完全唔認同，好玩嘅戰棋遊戲比比皆是，上年推出嘅《聖火降魔錄 風花雪月》就係一隻好出色嘅戰棋遊戲。接近廿二年前就有隻非常出色嘅戰棋遊戲《幻想大陸戰記》，新作《幻想大陸戰記：盧納基亞傳說》即將喺今年六月發售，鍾意呢類遊戲嘅朋友唔好錯過。

《幻想大陸戰記：盧納基亞傳說》（Brigandine The Legend of Runersia）係 1998 年 PS 上推出嘅《幻想大陸戰記》最新作品，由 Happinet 製作，屬回合制戰棋遊戲。新作由知名繪師風間雷太擔任人設，並且有知名作曲家佐藤天平擔任音樂製作。

遊戲舞台設置於幻想世界「盧納基亞大陸」，玩家可由六大勢力中選擇，並且可從過百名騎士以及魔物中編成自己部隊作戰，最終目標為統一整個大陸。遊戲中不論隸屬任何勢力，所有嘅騎士、魔物都會隨戰役而成長，亦都因為各色眾多嘅關係，所以會隨著遊戲進度而發展成不同面貌，亦即係有超高耐玩性。

至於玩家嘅騎士、怪物有各式各樣兵種，騎士們有擅長攻擊亦有擅長魔法的，只要反覆戰鬥就會成長，可以透過轉職令佢地成為新兵種。而怪物喺轉職後會變成高階種族，有時會甚至會擁有凌駕騎士嘅能力，十分可靠。

《幻想大陸戰記：盧納基亞傳說》預計於 2020 年 6 月 25 日發售，並且會與日版同步推出繁體中文版，由 Nintendo Switch 獨佔。