日本黑道一直都有電影、遊戲等各種作品，當中又以《人中之龍》系列最為人所熟悉。日前就有一隻同樣以黑道為題材嘅新遊戲《黑道牛仔》（Cowboy Yakuza）推出，不過主角就係一名黎自德州嘅牛仔，唔知二者溝埋又會唔會吸引到玩家嘗試呢？

《黑道牛仔》由 Active Gaming Media Inc. 製作，故事背景設定於八十年代日本，來自德州嘅主角 Cleve 棲身於大阪，但係因為太大隻被當地黑道睇中，故事就此展開。

遊戲採用類似《Diablo》式俯視角度，屬傳統動作冒險遊戲。遊戲系統簡單，都係靠普通拳腳同走位。比較特別嘅係主角有二種「變身」可用，分別係使用劍，擁有高敏捷性及耐力嘅「怨靈」。以及使用鬼金棒並擁有高攻擊力及體力嘅「鬼太鼓」，玩家需根據敵人類型及情況切換變身作戰。

另外本作嘅地圖其實都係參照現實中大阪各個地點製作，例如開發團隊公司附近嘅大阪本町靭公園、知名男性港人旅遊景點飛田新地等等。《黑道牛仔》現時已經喺 Steam 度做緊搶先體驗，暫時可以玩到第四章劇情，開發團隊亦都講明會喺今年春季實裝十章以上嘅更新內容，有興趣嘅朋友就試下啦，暫時只對應英文，之後會對應埋日文。