近年推出嘅二隻超高質橫向動作遊戲《Dead Cell》、《Bloodstained》都叫好又叫座，證明高質嘅橫向動作遊戲仍然大有市場。近日就有隻超高質同類型遊戲推出，講求技巧之餘仲加入大量解謎要素，同時要同黑警鬥智鬥力，講緊嘅就係早幾日推出嘅《Ministry of Broadcast》。

《Ministry of Broadcast》是由捷克獨立開發團隊 Ministry of Broadcast Studios 製作，故事改篇自知名小說《1984》，屬於單人橫向動作冒險遊戲。

故事講述國家於一夜之間建造起一座圍牆，將國家一分為二，亦都因為呢個原因主角同家人分隔二地。為咗再見家人，主角唯有參加由政府舉辦嘅「真人 Show」電視節目，聲稱只要喺節目中勝出就可以重獲自由，但慢慢就發現政府所謂嘅「承諾」同香港政府無乜分別，簡單講就係呃你去死，而執行嘅人當然就係黑警啦。

劇情就留返大家慢慢探索，至於遊戲本身就有好濃烈嘅《波斯王子》味。玩家好多時都需要用精準嘅動作配合適當嘅時機去避開陷阱或者係黑警嘅追捕。另外主角只係普通人，太高、有水嘅地方都係會令佢死亡，行每一步之前都要小心唔係就好易瓜老襯。順帶一提，遊戲入面嘅物理表現都算唔錯。

本作嘅解謎都極富心思，大部份時間都要同週邊嘅環境互動先可以解開謎題。例如要利用衝力先移得開嘅障礙物、只會出現一瞬間嘅拉桿等等。最正係有時需要犧生其他人先可以越過障礙，例如推個 NPC 落堆針度，你再踩喺佢條屍上面跳過對岸。

《Ministry of Broadcast》已於 1 月 30 日推出，對應平台為 PC Steam 及 GOG 平台，至於 Nintendo Switch 版就今年 4 月 28 日推出。