小島秀夫亦在籍 KONAMI 時嘅最後一個 Project《Silent Hills》一直係唔少玩家心中嘅一個遺憾。當年，K 社上演大台霸權，腰斬《Silent Hills》之餘，仲將遊戲導讀《P.T.》遊戲於 PlayStation Store 下架；呢件事距今已超過三年時光，不過依然係玩家經常談論嘅話題。

唔少玩家仲係不斷花時間研究《P.T.》，例如係 Speed Run，又或者係嘗試搵出有關《Silent Hills》嘅線索。早前外國網友 Lance McDonald 就嘗試改寫《P.T.》嘅 Coding，嘗試突破遊戲嘅大屋。

第一次原本以為成功，點知小島嘅團隊唔知係咪預料左有人會嘗試咁做，玩家一出間屋，就跌左落個窿，仲會遇上惡靈攻擊。喂，小島大神駛唔駛陰濕到咁！

不過你有張梁計，我有過牆梯；第二次嘗試時，Lance McDonald 再次改 Coding，令到玩家視角變成「懸浮」狀態，結果今次成功離開大屋，去左外面。

外面，即係《Silent Hills》Teaser 片段裡面見到 Norman Reedus 步行緊嘅小鎮。

雖然當時《Silent Hills》只係初步開發階段，不過，畢竟係連結《P.T.》嘅重要場景，明知道玩家唔可能於《P.T.》時候出到去，但係檔案裡面已經包含左初步嘅《Silent Hills》場景！

雖然用呢個狀態去「暢遊」《Silent Hills》街道並唔會有遇敵風險，不過應有嘅音效依然做到足，玩家依然可以感受到城鎮「唔歡迎外人」以及詭異嘅氣氛，都幾令人緊張。

當然，相信大家有生之年都無咩機會再玩到小島秀夫版本嘅《Silent Hills》，就算 KONAMI 而家話重啟呢個項目，玩家們亦都未必歡迎（畢竟 K 社咁樣對小島呀喂…），所以，好有可能從《P.T.》窺探到嘅呢個片段，已經係我地與《Silent Hills》最近嘅距離……。

完整片段在這裡：

相關文章：

【遊戲新聞】Norman Reedus 已經成功逃出《P.T.》鬼屋去左做送件員！！
【K社出手】《P.T.》重製版因涉及版權因素 已被官方要求下架