《新櫻花大戰》自公佈開發消息以來，一直係玩家熱門討論嘅遊戲，唔少舊玩家都對新作嘅人設表示擔心，亦對戰鬥方式由「戰棋」改為「動作」感到不安。

我一直都強調，好多遊戲，事前睇片係一回事，真係落手玩又係另一回事。對於《新櫻花大戰》，我明白要舊玩家去完完全全包容接受佢，係一件好困難嘅事，畢竟「真宮寺櫻」年代嘅《櫻花大戰》絕對係一代嘅經典。

不過，《新櫻花大戰》並唔係要超越前作，故事裡面嘅劇情，亦經由今集女主角「天宮櫻」口中帶出：我明白我地經驗唔夠，我亦知道我地無可能超越前人；就算我好想以「真宮寺櫻」為目標，但係我點都只會係「天宮櫻」。

但係，「天宮櫻」就係「天宮櫻」，《新櫻花大戰》就係《新櫻花大戰》，既然 SEGA 選擇前行，用全新方式去演繹佢地認為係貼合 2019 年水平嘅《櫻花大戰》，咁我就用全新嘅心態去投入吧。

當然，遊戲有優點，但同時亦有一啲不足，首先講左 3D 模組方面。

3D 模組唔等同人設，又，補充一點，《新櫻》除左主角群係由久保帶人老師設計之外，其他角色都係同唔同畫師合作，所以可以話係各有特色。如果大家有入手限定版，限定版裡面跟左本「設定集暨歷代畫集」，裡面可以見到所有老師們嘅人設圖其實係幾靚幾可愛的。

只不過，人設靚唔靚可以話係個人觀感，不過人物變成全 3D 模組，絕對係遊戲最大挑戰。《新櫻花》入面，人物動作比較僵硬，當中猶以面部表情為甚，較為「面癱」，加上模組取光、反光位都不夠自然，所以呢一點較為可惜。

不過，將 2D 立繪全部變成 3D 人物互動，可以見到 SEGA 其實努力地做緊新嘗試，或者只係經驗不足，相信無論係媒體抑或玩家針對 3D 模組方面嘅意見，都可以成為開發團隊一個好嘅參考。

光武以及新型機體「無限」嘅設計係靚的，特別係市面上有眾多機械人或者機體作品，今次《新櫻》裡面嘅光武都依然能保有自己風格，算係做得唔錯；同時，光武於戰鬥中登場畫面十分炫麗，仲有出場動畫，官方今次好重成本！

講起動畫，雖然《新櫻》以 3D 為主，不過由於遊戲馬上會製作動畫嘅關係，無論係 OP 動畫、以及遊戲中部份劇情都會有 2D 過場動畫交劇情變化，而 2D 動畫以及部份 2D CG 彩圖係做得頗為精緻的。

《新櫻》劇情交代簡單直接，雖然係好感類攻略遊戲，不過，最重要一環都係講緊團隊之間嘅信任同埋牽絆。合作總有吵架嘅時候，不過除左部份紛爭劇情，我諗同時係比機會玩家快速了解各位角色嘅性格，例如天宮櫻嘅率真爛漫、初穗嘅單純直接等等。

當然你未必認同所有角色嘅想法，而我相信玩家們對各個角色，都一定會有自己嘅喜惡；不過，可以令到玩家對角色行為有所感觸，或者都代表角色性格塑造算做得唔錯了。

遊戲裡面大部份配樂，背景音樂、戰鬥音樂、通訊器響聲，都係用緊「檄！帝国華撃団 新章」呢首 OP 嘅旋律，可以話係去到邊都聽到呢首歌。官方有為各個角色製作角色歌，如果可以將角色歌都充份融入到遊戲當中，相信會更加吸引。

角色好感 Event 似乎針對男性玩家而開發， 一來今次《新櫻》角色群衣裝露出度以及胸部大小都比較顯眼，二來，帝國大劇院下層有「大浴場」，玩家飾演嘅主角「誠一郎」不時會有機會可以去偷窺女角們出浴或者更衣嘅畫面；另外亦有好多機會，可以比玩家偷睇女角們裙底或者係胸口，絕對可以帶比玩家同以前舊《櫻花大戰》完全截然不同嘅感受。

作為女性玩家，以上劇情雖然多少令我不安，所以我好殘忍地將「誠一郎」所有艷遇機會都盡量減少，畢竟你係黎打仗架！你係黎守護帝都架！點可以每一章回都走去睇人沖涼呢？（笑）

接下來講下戰鬥方面。

玩家們對於戰鬥方面嘅意見頗多，大多意見傾向為「戰鬥變化性不大」。的確，我認同「戰鬥」係《新櫻》有最多改動空間嘅部份，既然開發團隊選擇棄戰棋方式，而選擇左佢地認為「貼合而家技術同年代需求」嘅動作方式，咁樣就應該於戰鬥裡面加入更多變化。

而家《新櫻》嘅戰鬥方式，比較似係簡化版嘅「無雙」；同時不能於戰場上鎖敵，遇到空中敵人時容易失焦。如果可以喺擊敗敵人會掉落配件，可以裝備或者強化機體、又或者加入升級系統，依玩家喜好去培育自己鍾意嘅角色、仲有增加難度等等，相信都會令《新櫻》嘅戰鬥變得更加耐玩。

同埋，雖然花組有五位女角色，但係大部份戰鬥，都唔容許玩家自行挑選上場戰鬥嘅伙伴，例如係日常隨機戰鬥，抑或係華擊團對戰。當中好大部份亦要求玩家必須使用天宮櫻作為伙伴之一，對於本命唔係天宮櫻而係其他女角色嘅玩家，相信會對戰鬥嘅呢個安排會稍為失望吧。

綜觀黎講，《新櫻》明顯見到 SEGA 想要破舊立新嘅決心，或者係因為首次嘗試，遊戲篇幅並不長，各位新玩家有時間可以一試（PS Store 上面有試玩版）；而《櫻戰》舊玩家要遊玩呢隻《新櫻花》的話，可能就要花多少少時間適應，不過遊戲中有唔少前人出現嘅海報或者明星卡，都算係一種淡淡情懷。

《新櫻花大戰》已於 2019 年 12 月 12 日上架，對應平台為 PS4，繁體中文對應。