今年東京遊戲展 TGS 2019 展出咗 2 隻非對稱對戰遊戲，其中一隻就係 Capcom 嘅生化危機新作《Project Resistance》。由於喺展前先公佈呢隻作品，所以實際到底係咩黎真係無人知道。我地有幸得到 Capcom 安排試玩一小時，感覺頗為新鮮，值得留意。

《Project Resistance》雖然係生化危機系列，但係暫時就未見一眾主角 Leon、Chris、Jill 等蹤影，不過喪屍犬、 Licker、暴君等都有登場。遊戲舞台係大家都好熟悉嘅浣雄市（Raccoon City），同樣係要面對次次都搞到一鑊泡嘅藥廠 Umbrella。

出一隻 Licker 已經好難打

遊戲屬不對稱對戰，玩家會分為二邊陣型，一邊係可操控房間設施嘅主謀「Mastermind」，另一邊係被俘虜至設施，四人一組嘅生還者。而每關都會分成 3 個區域，生還者一方只要於限時內通過全數區域就會勝出，反之計時器倒數完結又或者生存者全滅則主謀方勝利。

生還者四人組，各自有自己能力及定位

生還者一方係 Umbrella 俘擄黎做實驗嘅普通市民，今次試玩版有四位角色選擇，分別係補師（可顯示附近道具及範圍補血）、駭客（可暫時癱瘓攝影機）、近戰坦克（有團體加防 Buff）、近戰攻擊手（超強近戰攻擊力，試玩曾爆擊一拳扣 23xx 血量），每位角色分別有 1 招主動技（四選一）能及 1 招必殺技，因人而異，而角色不能重複選擇。

隊友倒地一定要救，過關條件係全員生還

生還者可以喺地圖周圍搜尋資源，但係唔好見野就執，因為並非每位角色都適用。例如近戰攻擊手並唔會使用槍械，所以有彈藥的話應該留比隊友執。另外仲要搵過關必需嘅 Key Item，如果玩家全部分散行動的話就好容易被對方逐個擊破。

生還者一方要周圍搵 Key Item 過關

生還者玩家地圖，只會顯示隊友位置及已探索地區

扮演主謀「Mastermind」嘅玩家可透過每間房中攝影機掌握生還者資訊，同時可設置機關、陷阱、放怪等等，而且更可以選擇其中一隻怪「上身」，自己落場操控該怪物去攻擊。另外所有機關及召喚怪物都可以即時進行，即係可以趁生還者搵道具時喺佢後面生隻怪出黎……而且最後更可以召喚暴君兼上身，頗屈機。

可以隨時召怪出黎，好屈機

腳邊生怪令對手防不勝防

可親自操控暴君落場無雙

主謀方開場前有得 Set 自己套 Deck

主謀有極強優勢，地圖會顯示所有生還者身處地點及掌握所有過關道具位置

試玩後感

現時遊戲平衡度似乎並未調整好，據聞可以完全通關所有區域嘅隊伍廖廖可數，又因為地圖大都頗為狹窄並且無緊急迴避等動作，所以生還者一方要逃命並不容易。加上即使搵齊所有 Key Item，但最後只要主謀方擺隻暴君喺終點度就接近必勝（暴君有一擊必殺技），因為生還者必需四人到達先算贏。

如果四位朋友一齊玩的話，的確係幾緊張刺激，但係平衡度方面必需要大力改善，否則只會步「名作」Evolve 後塵。

《Project Resistance》發售日期未定，對應平台為 PS4 / Xbox One / PC Steam。