SEGA 繼《新櫻花大戰》之外，仲有一隻令舊玩家極為好奇嘅作品，就係《人中之龍 7 光與闇的去向（人龍 7）》。

編輯部喺 TGS 2019 期間，出席了製作人橫山昌義先生以及阪本寬之先生嘅訪問會，亦現場試玩過《人龍 7》。我地嘅綜觀感覺就係，「人龍」嘅極道世界觀，依然流動在《人龍 7》裡面，不過，我地認同製作人所講，唔應該拎「桐生一馬」以及新作主角「春日一番」黎做比較，因為，兩位角色，果然係完全不同的人。

左：阪本寬之先生 右：橫山昌義先生

好多朋友都好奇，點解《人龍 7》要改變遊戲模式，由沿用多代嘅即時動作遊戲，改為動態 RPG 制式？製作人表示，桐生一馬嘅出身同埋性格，令佢擁有「孤狼」一樣嘅性格：唔想麻煩其他人，想自己一個人搞掂哂所有野，所以《人龍 1～6》桐生篇嘅時候，會選用以佢單人匹馬勇闖敵陣嘅戰鬥方式。

但係，春日並唔同。雖然與桐生一樣係孤兒，但係佢係受左東城會嘅「恩」，所以先決定賣命比組織。喺日本黑道文化裡面，小弟幫大佬頂罪，係一個好常見嘅文化；只不過，春日無諗到自己會成為棄卒，所以佢根本無覺悟，要自己一個人去「拯救」或者「改變」任何野。

因此，《人龍 7》入面嘅春日，需要嘅係同伴，需要嘅係成長；亦因為咁樣，製作人認為 RPG 形式會更符合「春日篇」嘅世界觀，加入動態部份，就係想同時保有《人龍》風格嘅極道打鬥感覺。

試玩過後，我諗，舊玩家的確需要一啲時間去習慣《人龍》變成選項形式嘅戰鬥。

另一方面，因為「桐生一馬」同「春日一番」嘅性格相當唔同，雖然以往《人龍》系列裡面都會有大量惡搞趣味支線，不過呢種「搞鬼」風格，喺《人龍 7》裡面有更加明顯表現，無論係春日「轉職」嘅選擇（可以做《Dragon Quest》類型嘅勇者）、或者特別攻擊技能（唔知點解可以打打下交叫速遞，然後從天而降大量龍蝦去攻擊敵人）、甚至搵錢謀生嘅方式（拾紙皮、去汽水機搵下有無人拎漏左散紙）等等，如果本身係《人龍》歷代老玩家嘅朋友，或者會覺得有少少無厘頭，但係，同時亦見到官方好用心咁，去為玩家區分「桐生」以及「春日」係非常唔同嘅人物同埋故事。

製作人亦補充，雖然「桐生」及「春日」係兩條故事線，但係大家係享有相同世界觀的，雖然目前唔可以公佈太多，不過，前作曾經出現過嘅角色，依然喺「故事嘅另一方」生活緊。唔知係咪代表我地可以期待會見返一啲老面孔呢？

《人中之龍 7 光與闇的去向》已定於 2020 年 1 月 16 日繁體中文版同步上架，對應平台為 PS4。