【遊戲感想】世上沒有一場不流血的革命！為了理想而戰《火焰之紋章～風花雪月》本年度最佳遊戲之一

無論你係唔係《火紋》系列 Fans，或者，無論你鍾唔鍾意玩育成戰棋遊戲，《火焰之紋章～風花雪月》，絕對係一隻非凡嘅出色作品。佢唔止係一個遊戲，佢嘅劇本，好多對白，都令我玩到內心不禁緊揪。

為左方便未玩／無玩遊戲嘅朋友，先黎簡單講一講故事背景。

玩家飾演傭兵（男女自選），後來成為教會賽羅斯士官學校嘅教官。你可以喺三個班級中揀選一個任教，而每個班級嘅領導學生，分別為「黑鷲」–阿德剌斯忒亞帝國（紅色・艾黛爾賈特），「青獅子」–法嘉斯神聖王國（藍色・帝彌托利），以及「金鹿」–由權貴組成嘅雷斯塔諸侯同盟（黃色・庫羅德）。一旦揀選班級，就會開始進行佢地勢力相關嘅故事路線。

故事大綱其實係共通的，只係你出發以及視點嘅分別，前期係「士官學校」路線，表面上一片歌舞昇平；中期崩壞之後，就變成「三國分裂」嘅路線。

遊戲一共有四個結局，除左上面提到嘅三個班級路線，仲有一條教會線。

利申女玩家，所以第一條路線，我係因為顏值所以揀左「青獅子」線先的，好膚淺，對唔住。不過，又真係誤打誤撞，去到「青獅子」線中期，先發現原來「黑鷲」皇女先係故事真正主角，玩左帝彌托利線先，都未嘗唔係一件好事。

喺意識到艾黛爾賈特線先係主角之後，我嘅攻略路線如下：
青獅子→黃同盟→黑鷲（教會）→黑鷲（帝國）

如果要比較各個路線嘅分別，我會認為，青獅子路線，係最表面嘅結局。

帝彌托利由單純嘅復仇殺人狂，變成「君主」，將亂世帶回到和平狀態，但係真正嘅威脅、以及教會制度嘅問題，劇情就無交代太多。

而金鹿路線，可以話庫羅德係一個旁觀者嘅身份，佢並唔係想稱霸國家，亦唔係貪戀權力，佢只係被交負一個責任，要令自己嘅同盟可以安居樂業；所以，面對艾黛爾賈特或者帝彌托利「斬草除根式」嘅侵逼，庫羅德必須要承擔「保護家園」嘅責任。

至於艾黛爾賈特，今代《火紋》嘅真・主角，佢嘅一生，就係童年被強加紋章，長大後承受被強加嘅命運，所以，對於「生活」有極為複雜嘅體會，包括貴族霸權、紋章就是力量與階級、教會就是一切等等嘅現狀，艾黛爾賈特都極為厭惡。

因為反感，所以想要改變；但係要改變，就要革新；要革新，就要破釜沉舟，就要有「有所犧牲」嘅覺悟，因為沒有一場革命是不流血的。所以，艾黛爾賈特面對阻礙自己嘅人同勢力，手起刀落，殺得沒有一點猶豫，於故事中盡情施行佢嘅霸業。

最後，佢成功了，國家統一，我個人係選擇放庫羅德一條生路，但係與艾黛爾賈特站在完全相反方向嘅帝彌托利，玩家並無選擇嘅餘地，一斬成永訣。

有幾位與我同時開始攻略遊戲嘅朋友，都不約而同問我，「你最鍾意邊一個角色？」OK，講顏值，當然還是首選帝彌托利，~~我是金髮控呀~~……但係，庫羅德充滿人情味嘅性格，係最令我有所共嗚的。

「金鹿」路線令我最深嘅感慨係：「有得揀，邊個想上戰場？」

金鹿線係令我感受最深的。庫羅德無得選擇自己嘅命運，但佢亦唔係想一統天下做霸主，佢只係想守護好自己嘅家，想自己同埋伙伴們生活安居。

但係，其他勢力嘅侵攻，步步進逼，自己除左企出黎，已經無其他選擇。行出黎，就要有對抗嘅覺悟，因為，理念，是很難去共存的；活在其他勢力的陰霾下，當然亦唔會有真正的自由。

如果你愛香港，睇到呢度，你明我點解對呢隻遊戲如此愛不惜手嗎？

當然遊戲並唔係完美，例如難度。

《風花雪月》難度就算玩最難＋經典＋唔繼承 Save，都唔算非常困難，係時間耐啲……只要啲學生勁加練習，又有白魔法補血嘅話，基本上場場戰鬥都係出去開無雙（不過官方剛剛更新左加強難度，黎緊會挑戰唔繼承 Save 開最新難度）。

攻擊技方面，無論係魔法定係物理攻擊，多數都係直線攻擊扣血，最大分別就係攻擊距離。如果魔法技能上面可以多啲變化（例如弱化、麻痺）等等，相信戰鬥樂趣會更多。

另外，如果遊戲一開始嘅「學院篇」可以變成共同路線，去到關於位置先選擇勢力，相信遊戲節奏亦會有改善；因為而家每個角色路線都要由頭開始玩，但係頭 1／3 劇情基本上所有角色是重覆的。玩第一次還好，第二次開始有點悶，第三次面對同樣劇情時，我就有點睡意了，所以只好快手衝劇情，直至進入角色線為止。

不過，遊戲要讚嘅地方，畢竟比要「彈」嘅地方多，例如人設。今次《風花雪月》人設由畫師倉花千夏老師執筆，對於女性玩家黎講應該有非常致命嘅吸引力（笑），而大部份角色形象都鮮明。

另一樣要讚嘅，係音樂，特別係主題曲。由日本歌手 Caro 主唱嘅「フレスベルグの少女～風花雪月～」根本係劇本嘅最佳演繹、皇女故事嘅最佳寫照；而遊戲嘅 BGM 亦都非常貼合故事嘅形象。喺開始攻略遊戲無幾耐，我已經將主題曲隻 Single 同埋 Soundtrack《ファイアーエムブレム風花雪月 Sound Selection》全部都買左返黎了。