現時不論香港定日本機舖，十間有十間都一定有各種類型嘅釣魚機，話晒受歡迎丫嘛。而早前 BANDAI NAMCO Entertainment 就正式推出佢地街機大受歡迎作品《王牌釣手》（Ace Angler），推出家用機版本玩家最高興嘅當然係慳返唔少啦，但玩完之後就發現今次移植版的確有用心去做，並非搬字過紙！

《王牌釣手》係街機《Ace Angler》系列移植作品，黎到 Nintendo Switch 版以 Joy-Con 取代原版嘅釣竿型控制器，但仍然高度模擬到揮竿 > 捲線動作，另外仲追加 Joy-Con 震動功能，增強釣魚感覺。

咁點解我地會話今次係一隻「超移植」作品呢，除咗還原度甚高嘅操控感，仲因為新模式而變得完整。舊有街機模式改名叫做「硬幣模式（メダルモード）」 ，有得抽卡升級機台等等，屬超爆肝模式，啱晒本身有煲開嘅朋友。而新增嘅一人遊玩模式「冒險模式（ぼうけんモード）」正正就係今次重點模式！

移植版三大模式

有正常街機 Mode「硬幣模式（メダルモード）」

就算係移植都有加入強化元素，算係咁

好有心做嘅「冒險模式（ぼうけんモード）」

「冒險模式」簡單講就即係故事 Mode，故事內容就無謂講啦（太 Hea），但係點解話呢個模式正呢，因為此模式完善化整個遊戲系統。喺原作街機版又或者「硬幣模式」 入面，釣唔釣到魚好多時都係講彩數，但係「冒險模式」就將整個系統變化，每條海鮮都會有自己屬性、血量，對應返相關魚竿就會令攻擊及成功率增強。另外街機模式釣唔釣到魚好多時講運氣，但黎到「冒險模式」就將之系統化，魚咬完餌之後進入鬥力狀態，魚會持續扣減體力，扣晒就會釣到條魚。當然鬥力過程玩家一方都會扣減少量體力，不過當魚接近畫面邊緣時就有機會逃脫，萬一逃脫玩家就會扣減大量體力。

個故事有梗

開場前用聲納 Scan 下啲魚就會知對應屬性，用返同屬魚竿會加強上釣率及攻擊力

鬥力過程中，一般收線程況下會增加必殺技量表，儲滿就可以出必殺技（廢話）。但鬥力過程中魚必定會接近畫面邊緣，為咗唔比條魚走就要使用強力收線，但用強力收線時必殺技量表就會減少，所以鬥力過程並唔係齋收線，需要有技巧地收，因為要儲埋必殺技黎打王。

鬥力係有技巧的

鬥力過程中有機會出現「絕佳機會」，成功的話會對魚做成大量傷害

每儲到一行必殺技就可以出一次電擊，電完條魚必定會去返畫面中間，好好用

左下圈圈儲滿就有得出超必殺技

Boss 發動攻擊時要左右 Fing 左邊隻 Joy-Con 黎擋

玩家通關後會因應成績而得到各種素材，都需要刷下素材黎整新魚竿。不過呢個最好玩嘅模式關數略少，比較可惜。

總結：

《王牌釣手》各方面都做得唔錯，無論係爆肝街機 Mode 定係故事 Mode，加上雙手要不停郁動當健身都唔錯。唯一要挑剔嘅就係一定要用體感模式遊玩，因為要拆晒 2 隻 Joy-Con 出黎玩，所以出街時係無得拎住部機玩的，一係用 Desktop Mode 一係用 TV Mode，有少少浪費咗 Nintendo Switch 嘅便利性。但總括而然，本作絕對係一隻老少咸宜、耐玩度又極高嘅遊戲，仲要有得四打，幾條友圍埋一齊 Fing 其實都幾歡樂，推薦買新機果陣跟埋。