玩生存突顯人性雖然唔係咩新題材，不過呢類遊戲多數都係動作又或者射擊類型，而今次介紹嘅《Frostpunk》就有啲唔同，佢係一款「社會生存遊戲」，玩家需要帶領整個社群去生存。當中玩家可以控制社群發展嘅方向，充滿道德感、希望；定成為一個連人肉都可以食，漠視人民訴求嘅社會（尤如現時香港政府），全部操控在你手中。
所有決定都會有代價
《Frostpunk》PC 版其實上年已經推出，由曾經製作《This War of Mine》嘅 11 bit studios 開發，而最新嘅消息就係本作將會於 10 月 11 日登陸 PS4 及 Xbox One，同時官方亦都發表咗新預告片。
《Frostpunk》講述人類活於一個冰天雪地嘅世界入面，倖存嘅人類依靠蒸氣驅動嘅供暖科技生活。玩家扮演社會領袖，除咗建立地球上最後一座城市，並且使用各種途徑取得市民生存必需嘅資源。
一個社會除咗生存必需品之外，仲會伴隨住道德、法律等等嘅規限，否則就有如香港警察一樣只係禽獸。所以遊戲中有「希望」及「不滿」二項重要數值，如果玩家只係不停計算溫飽、勞動力等等，奉行嚴苛政策、社會全無道德、只當市民係社會上嘅一舊零件的話，人民就會抗議、甚至引起暴動。如果想玩到 Happy Ending 的話就要令市民對生活感到希望，呢個亦係官方表明遊戲中最重要嘅元素。
下方紅色藍色數值條表示「希望」及「不滿」二項重要數值
可派出探險去去探索外面世界
當然係絕境下自然有玩家想行極端高壓社會，遊戲中亦有提供呢類極端路線。例如係資源匱乏情況下，你可以將食物分享比老弱病患盡顯大愛，但係亦可以通過法律使用童工、進行人體實驗尋找治療方法，甚至行隱藏路線通過「Alternative Food」（替代食物）法律，亦即係食人肉！
隱藏路線，通過食人肉法律
《Frostpunk》家用機版將會於 10 月 11 日上市，對應平台為 PS4 及 Xbox One，遊戲將包含PC版本所有免費更新內容，另外亦都為家用機版進行操作進行調整及最佳化。
不撤不退，我愛香港。