唔同嘅直播主做遊戲直播，想得到嘅野都唔同。有人想上位想紅，有人純粹想同人分享遊戲；而加拿大有位 13 歲嘅少年，7 月開始長時間喺 Twitch 平台做《Fortnite》直播，佢唔係不學無術想借打機發電競明星夢，佢打機亦無任何特殊技巧令人嘆為觀止，但係，佢都係好努力咁做，好努力咁同觀眾交流。

佢做直播，係因為想幫爸爸籌到醫藥費。

來自加拿大、網名為 ZylTV 嘅呢位加拿大籍 13 歲少年，佢爸爸於 2018 年 9 月 14 日確診患上直腸癌第三期，仲有轉移到肝臟及肺部嘅跡象，癌細胞目前已經惡化到第四期了。

佢爸爸如果唔做化療，就只會剩返唔夠一年壽命；如果做化療，就有 20％ 機會將壽命延長估算三年左右時間。雖然知道生命總會有完結嘅一天，但係，ZylTV 好想為爸爸爭取多一日就係多一日，因為佢好鍾意爸爸，好珍惜爸爸同佢建立嘅所有回憶，亦都好希望可以爭取與爸爸建立多一日回憶嘅機會。

不過，一個初中一年級嘅 13 歲少年，佢無一技所長，亦唔可以出外打工；又，佢爸爸於今年 2 月已經停止工作，所以為左幫輕屋企，佢能夠做嘅，就係長時間地做直播，希望引起網路關注，捐錢比佢嘅 Twitch 頻道。

雖然 ZylTV 打機唔係叻，但係真性情嘅表現，例如好似小朋友一樣稚嫩嘅笑容，輸左遊戲會唔開心，但係又願意再接再厲嘅表現，大家都喺直播中見到了；有時玩玩下機瞓著左，直播映住佢 ZylTV 瞓覺，都令一眾網友既好笑又擔心。

佢呢份心意當然亦都有得到回報，佢嘅頻道目前已經有超過 2,5000 個 Follower，而佢最初只係想為屋企籌集 5,000加幣（約港幣 30,000），不過目前金額已經超過 15,000 加幣（約港幣 90,000）。

Reddit 上有網友表示，做化療要好多錢，照顧病人都要好多錢，至於佢爸爸離開之後，屋企失去經濟支柱，ZylTV 嘅成長都會需要金錢。大家幫到幾多得幾多。

ZylTV 嘅爸爸知道個仔咁有心，又知道網路上咁多好心人，早前喺兒子嘅直播上面，親身多謝所有付出溫暖嘅朋友。

而 zylTV 本人喺好感激伸出援手嘅朋友，於 Twitter 上面留下感謝嘅訊息：

OMG EVERYONE! I can’t even thank anyone from this stream with words. I’m truly speechless. You guys changed my and my dad’s life forever and me and my dad will remember this my whole life. Thanks to 1/2

— zyl (@zylTV_) July 8, 2019

睇到呢度嘅朋友，有興趣嘅都 Follow 佢嘅 Twitter 同埋 Twitch；雖然唔知佢爸爸仲可以支撐幾耐，但係我地都送上祝福，希望 zyl 可以好好珍惜呢段共處嘅時光呀。