E3 2019 已經告一段落，但係其實除左奇洛李維斯代表嘅《Cyberpunk 2077》以及《Final Fantasy 7 Remake》之外，今年 E3 其實有唔少滄海遺珠嘅作品，例如今日介紹呢一隻《GreedFall》。

《GreedFall》由 Spiders 開發，Focus Home Interactive 發行，已經定於今年 9 月 10 日於 PS4、XBox 以及 Steam 平台上面發售（Steam 版上架日為 9 月 11 日），係一隻動作型探險 RPG。

故事發生在 17 世紀某個荒島上面。荒島上面有寶藏，亦傳說有失落文明嘅神秘力量，所以吸引大量殖民者、探險家、以及財寶獵人遠赴到島上一探究竟。

玩家飾演嘅係殖民者，你居住嘅大陸，疫病漫延，所以你代表國家急需要搵到一個新嘅殖民地方；但係面對殖民者粗暴嘅侵略入侵方式，島上嘅原居民唔止敵視你，仲隨時準備武力抗爭。

不過，島上面其實亦都有神秘傳染病「Malichor」，搵出病毒源頭，都係玩家主要任務之一。

截圖來自美媒＠Games2Day試玩片段

玩家可以挑選性別，亦可以開 Game 之前調整自己嘅能力比例，因為遊戲除左做勇武派，仲可以揀做外交派；因為你同原居民嘅關係一旦修復，佢地就會慢慢幫助你。遊戲喺細節上面做得好足，例如你去與唔同嘅人去交涉，無論對話、去到你當時嘅裝扮，都會影響對方嘅好感度。

提升原居民好感度嘅，仲有支線任務。完成特定任務，幫佢地解決問題，佢地都會慢慢成為你嘅同伴，係一個非常人性化嘅設定。

截圖來自美媒＠Games2Day試玩片段

除左外交，當然要講埋戰鬥部份。先唔講同原居民之間嘅鬥爭（因為照道理就唔應該同佢地開拖嘅……），島上面都有大量兇猛異獸要對付，畢竟玩家主要任務，除左打關係，仲要搵出疫病源頭、寶藏等事物。戰鬥方面，遊戲中提供大部份近戰以及遠距離武器，亦會有魔法元素，玩家可以自行組裝你想用嘅技能去推進劇情。

技能盤是咁的。截圖來自美媒＠Games2Day試玩片段

動作部份屬於即時戰鬥類型，除左 Attack 仲有 Barry 選項去自訂連接近接技，戰鬥有時會出現強大頭目。暫時未知遊戲難度如何，如果我地有機會試玩到會再同大家分享。

截圖來自美媒＠Games2Day試玩片段

截圖來自美媒＠Games2Day試玩片段

《GreedFall》係單機遊戲，所以玩家於遊戲中結伴同行嘅都係與你關係好嘅 NPC，不過人際關係於遊戲中非常關鍵，如果與同行人關係變差，佢隨時反轉槍頭背叛你。

工作室話想將現實世界嘅政治角力元素以及人情世故融合到遊戲裡面，唔知最後出到黎效果會係點樣？不過呢隻遊戲會係編輯部今個 9 月其中一隻密切留意嘅作品，雖然角色面相唔算特別精緻，但係喺世界觀以及場景方面似乎就落足心機。

以下為《GreedFall》於 E3 2019 期間外媒 Games2day 公開嘅試玩影片，以及官方宣傳片：