有返咁上下機齡嘅玩家都唔會對「金手指」呢樣野陌生，以前直頭係《機戰》最佳拍檔添。呢樣野簡單講就係透過外部方式去修改遊戲參數，從而取得大量資源又或者開啟本身無得使用嘅角色 / 道具等等。隨時代進步，出現咗一種幫人改存檔嘅服務，即係幫你修改存檔變成有晒超勁裝備咁，但原來現時日本做呢樣野係違法的，日前就出現首宗因修改遊戲存檔而被判罪事件。

改 Game、外掛等如用於線上遊戲會對其他玩家做成不公平現象

根據日本七月一日報導，日本新潟縣三条市東本成寺一名 39 歲男性，因為對人氣遊戲軟件進行不正當改造及販售，違反「不正競爭防止法」而被判罪，同時亦係日本全國首宗案例。

報導指該犯人以特殊技術手段將玩家所提供嘅遊戲存檔進行修改並強化，嚴重影響其他玩家權益以及影響遊戲平衡性。而被修改嘅遊戲分別係 3DS《Pokémon Sun & Moon》，以及 PS4 嘅《Monster Hunter World》。

呢名男子被指於今年一月購入以上二款遊戲，並且使用自家電腦修改遊戲。然後再通過網絡拍賣賣比另外二位人士，而且於拍賣網站上嘅描述寫明「如中標者有特別要求，可以更改存檔內的數據」，並被被新潟簡易裁判所判處罰款 30萬日元。

其實日本舊年十二月已經修改「不正競爭防止法」，簡單講就係將法案保護範圍擴大，當中包括轉讓遊戲修改器或已改造成品、代替他人對遊戲數據或遊戲機器進行改造等，違法者最高可被罰 500 萬日圓及監禁5年，而且屬於刑事罪行。

雖然呢條法案只適用於日本地區，但係如果用被修改過嘅存檔玩日版遊戲時，遊戲公司有更大條道理去封鎖帳號，值得留意。

其實單機用金手指都係犯法的，不過法案不適用於海外玩家