有「恐怖遊戲之父」嘅三上真司，於今晨 Bethesda Softworks 嘅 Showcase 率領個人遊戲團隊 Tango Gameworks 發表全新遊戲《GhostWire: Tokyo》，係繼《Evil Within 2》之後三上首個擔綱作品。

《GhostWire: Tokyo》目前公開嘅只係 Teaser 片段，舞台為現代東京，人群因為不明原因而「神隱」。玩家飾演嘅主角似乎有特殊能力，但係敵人真身仲係一個謎團，到底神隱事件背後係一個點樣嘅陰謀，目前亦係惹人注目嘅一部份。

片段顯示大量超真實電影式畫面，喺團隊創作之下嘅東京，繁華之餘，亦滲透著微妙嘅詭異感覺。遊戲裡面亦似乎加入大量日本傳統文化元素，除左「神隱」呢一個都市傳說之外，仲見到有鳥居、天狗能面等等元素，對於鍾意驚慄遊戲嘅朋友黎講，呢隻《GhostWire: Tokyo》相信係今次 E3 其中一個亮眼點。

目前仲係概念片段，有最新消息會再同大家跟進。