【我哋大家】香港精神 LEGO微縮場景獅子山下

香港有好多特色建築同地標景色，好多外國朋友提起香港就特別鍾意香港維港兩岸嘅夜景同埋彌敦道五光十色嘅招牌。作為香港土生土長嘅我地，問到最代表香港嘅景物，十個有八個都應該會答係獅子山。

LEGO 創作者 Tŵilight Yelloŵ 向來主力砌開人物角色同機械人，有次勁到用 LEGO 砌左 5 隻吉姆(其中一隻其實係 Blue Destiny 一號機)，仲要可以 5 隻合埋體變巨形版「戰神GM」。雖然砌開機械人，但為左挑戰下其他題材以及參展今年 6 月嘅 Japan Brickfest 2019 (JBF 2019)，結果就搵個比較熟識嘅主題去試一試，製作左下面呢個獅子山下場景。

Microscale LEGO Lion Rock by Twilight Yellow

雖然獅子山對好多香港人嚟講係好標致性，而熱愛行山嘅 Twilight Yellow 有次同太太行到獅子山山頂嘅時候，望返落去成個山下境色而有所感動，加上想記錄同表達當時嘅感受，就決定要做呢個獅子山下嘅作品。

最初佢真係走返去山下嘅屋苑度考察同睇下當中有咩特色細節點樣用組件去表達出嚟，但發現喺高樓大廈當中其實係睇唔清楚，最終要靠 Google Earth 先睇得返啲細節出嚟。

龍蟠苑同星河明居

竹園邨

黃大仙

彩虹邨

雖然 Twilight Yellow 有跟返部份嘅高度比例，但基本上佢話自己係「以意創造」，太過照住比例去做嘅話出嚟就唔太好睇，佢亦笑自己嘅慈雲山同竹園邨近得濟。不過就算官方嘅 Architecture 系列或者其他微縮場景作品都係意境重要過一切，加上首次挑戰微縮場景就可以做到咁複雜嘅作品已經唔簡單。<span data-mce-type="bookmark" style="display: inline-block; width: 0px; overflow: hidden; line-height: 0;" class="mce_SELRES_start"></span>

問到 Twilight Yellow 今次做出咁出色嘅微縮場景作品，會唔會已經諗緊下一個香港微縮場景，佢話自己作為大埔人已經係想砌大埔林村河，不過礙於工作同要製作其他 JBF 2019 參展作品，所以短期內未必砌得起，但呢系列會繼續進行，所以大家記得留意住佢嘅作品 Facebook Page 之餘，佢仲已經將 獅子山下 放左上 LEGO Ideas 度，想擁有嘅朋友記得上 LEGO Ideas 度投佢一票啊！