Square Enix 於今日嘅 Nintendo Direct 公佈一隻名為《鬼ノ哭ク邦》嘅動作 RPG，遊戲將於 2019 年夏天登錄 Switch、PS4 以及 Steam 平台。

遊戲雖然係 SE 發行，不過就係由曾經製作 RPG 遊戲《いけにえと雪のセツナ》以及《LOST SPHERE》嘅新紮工作室 Tokyo RPG Factory 所開發；呢兩隻傳統王道 RPG 為 Tokyo RPG Factory 打響名堂，所以今次再推出新遊戲，更加係受到各界玩家注目。

玩家於《鬼ノ哭ク邦》裡面飾演「守護者」カガチ，而你嘅工作就係要確保往生者可以順利由「生界」穿越「死界」直至成功輪迴；當中會遇到一啲迷途嘅亡魂，佢地有啲會幻化為妖怪，所以點樣可以順利將佢地引導去彼岸就係主角嘅日常工作。

直至一位神祕少女嘅出現，主角嘅生活出現極大變化…。

畢竟係 Tokyo RPG Factory 出品，所以遊戲氛圍繼續帶住淡淡幽鬱風格，目前釋出資訊未算多，不過揉和「和風」嘅幻想系設定叫我頗為期待。戰鬥方面，玩家本身嘅角色可以操控多種唔同武器，視乎你點樣發展你嘅能力表。

Tokyo RPG Factory 能否喺上兩隻出色 RPG 作品之後再下一城，今個夏天就等我地一齊感受！以下係遊戲首條 Trailer：