白金工作室係遊戲界已經係品質保證，雖然備受關注既《Granblue Fantasy Relink》已經無白金份，但係玩家們唔洗擔心，因為另一隻原創全新科幻大作《Astral Chain》即將面世，將由曾經製作《Bayonetta》、《NieR:Automata》既白金工作室操刀，再加上殿堂級漫畫家桂正和，為大家帶黎極吸引既遊戲內容！

任天堂今年首個線上發布會「Nintendo Direct 2019.2.14」入面，正式宣布由白金工作室製作既科幻動作遊戲《Astral Chain》將於今年 8 月推出，並且釋出相關影片。雖然未有詳細講述遊戲系統、設定等等，但係都可以係片中見到各種線索。

遊戲屬於動作冒險類型，採用日系漫畫風格。玩家將可以係二位角色之中選擇（一男一女），扮演執法者警察角色，並且使用稱之為「Legion」既武器。另外係戰鬥中途可以召喚類似 JOJO「替身」既角色幫手，除咗幫手攻擊仲可以同主角共同使出連攜攻擊，當中狗型替身仲可以騎乘。

背景設定係近未來世界

玩家扮演警察一方

似乎有得玩潛入

另外值得留意既係影片內所展示既動作極之流暢，如果係 Switch 實機影片的話，本作將會係 Switch 上面流暢度最高之作品。而除咗殿堂級漫畫家桂正和（《Zetman》、《電影少女》、《I’S》等）為遊戲擔任角色設計之外，其他陣容亦都唔小野，有《NieR:Automata》遊戲監督田浦貴久，仲有知名遊戲製作人神谷英樹，完全係星光熠熠。

可以同「替身」作出連携攻擊

巨型 Boss 戰又點少得

《Astral Chain》預定於 2019 年 8 月 30 日發售，對應平台 Nintendo Switch。