《Cyberpunk 2077》預計將於 2019 年內推出，遊戲自宣佈以黎一直備受玩家期待；不過，正當遊戲進入最後開發階段嘅時候，CD Projekt Red 嘅創意總監 Sebastian Stępień 居然辭左職，仲轉工轉左去暴雪（Blizzard Entertainment）！

Sebastian 喺 CDPR 工作左 12 年，由《Witcher》系列嘅對白及故事設計師開始，慢慢成長到成為公司嘅創意總監；而《Witcher》系列能夠大受歡迎，作為系列靈魂人物之一嘅佢，相信亦都居功不少，因為 CDPR 所有遊戲嘅世界觀以及文字撰寫，都由 Sebastian 擔綱。作為《Cyberpunk 2077》嘅其中一位核心開發人物，遊戲未正式推出就離開左 CDPR，相信或者會有唔少玩家暗暗擔心「咁個遊戲會唔會有所影響？」

轉投暴雪嘅 Sebastian 到底會負責邊隻遊戲，目前仲係未知數；不過，我又認為故事、對白、大綱呢啲設定，應該屬於遊戲早期開發就需要訂立好嘅元素，所以亦有可能 Sebastian 係做好哂呢部份嘅工作先至離職都唔定！

至於 CDPR 嘅總監 Adam Badowski 剛剛亦公開出 Post 話會設立新工作室，希望有意之士黎求職咁話，睇黎公司運作並未受到 Sebastian 離開而有咩影響……

又或者咁講，人總需要向前行，大家合作左接近 13 年，緣來緣去，大家或者都需要一啲新嘅火花先可以創作到更好嘅作品嘅！作為玩家，我當然就希望可以盡快玩到《Cyberpunk 2077》啦！如果你唔認識呢隻遊戲，歡迎你參考以下呢條 Trailer：