好多空戰遊戲嘅玩家同我一樣餓左咁多年，一直就係等《Ace Combat 7》嘅出現！由 2015 年公佈到今時今日，儘管前幾年出過隻《Ace Combat Infinity》，對一班玩開《Ace Combat》系列嘅，點都係正傳好！而且今次係正傳首次中文化，有冇跟開故事都好，對好多玩家都有好重要嘅幫助！

戰場上好多突發事件，今次中文化係幫到好大忙

如果你係新玩家第一次接觸《Ace Combat》系列的話，係會對佢嘅敘事方式有啲摸不著頭腦。事關故事敘述方式係以事件中唔同人物嘅角度去講出嚟，而非以主角或第三者角度去觀察。所以每個角色都有佢對今次戰事前因後果嘅見解，唔係單方面嘅正與邪對立，如果你想睇一個熱血皇牌機師故事，對唔住啦今次未必啱你口味。

故事舞台終於去返 Strangereal 呢個世界，延續正傳第 5 集。如果以前懶睇英、日文嘅，今次中文化了解清楚個故事，玩起上嚟更投入

有啲劇情仲要有洋蔥 TwT

系統同操控回歸到基本空戰，真係叫多左嘅只係「強化零件」，同時減省左前作好多負面評價嘅”新嚐試”。而且唔知係我自己錯覺定真係有所改變，機體基本操控上嘅最高/最低速度喺操控上容易左，冇左以前經常失操同失控情況。新玩家係容易上手，反而舊玩家就唔知會唔會覺得太簡化。

特別一提今次可用機體唔係故事情節解鎖，而係好似技能樹咁，你想最終開發特定嘅機體，咁就要儲錢開晒佢前面嘅機體同強化零件。以我為例，我最終想用 YF-23，咁我最快就要由初始嘅 F-16C 經 F-14D、F-15C、F-15E 開發呢三架機就開到 YF-23，唔洗好似以前咁乜機都開。

急轉嘅操控簡單左好多

Dogfight 簡單但係刺激

今集強化機體零件，零件仲要有分單人同多人模式使用，不過唔同模式賺嘅錢都係通用，所以大家可以大晒單人模式賺夠錢先同其他人Online打

揀定目標，咁就唔會浪費 F-16C -> F-14D -> F-15C -> F-15E -> YF-23

今集其中一個賣點就係戰場上嘅天氣變化，畫面靚左就一定啦，出入雲層亦加多左水點嘅效果，同時天氣狀態係會影響機體、雷達以及飛彈嘅效能。擊中嘅效果亦唔係 Hea 過，雖然只係一秒半秒嘅畫面，但係交足功課有多。

空中上嘅仔細度滿分，可惜地面就差強人意。地面建築都收貨，遠睇你都唔會覺得問題，但去到啲山坡、城鎮、市區，低飛嘅時候你就會見到個地面偷雞偷到盡。雖然冇好大嘅影響，但呢個絕對係需要大大改進嘅地方。

唔好以為啲雷雲係裝飾，打中左真係會影響雷達

擊落敵機爆炸冇攻擊效果，大家放心 Dogfight

啲建築係可以做到咁仔細

場境地圖遠睇係收貨嘅

近睇啲偷雞位出晒嚟

當然你會問點解我一直冇提及 VR ，的確用 VR 玩《Ace Combat 7》係最適合不過，而且如果你係等左《Ace Combat 7》咁耐而想為佢而入手 PSVR 嘅話亦都係絕對值得，而且配埋 Flight Stick 就更加無敵！

不過每一個任務順利嘅話都大約要用 15-20 分鐘，對我地呢啲老鬼嚟講真係玩多兩版都頂唔住！而且都試過一啲平價少少嘅 Flight Stick ，個遊玩感受真係我不如用返手掣好過！

所以如果大家金錢上許可嘅，PSVR 加 Flight Stick 玩《Ace Combat 7》真係返唔到轉頭！不過如果兩者選其一嘅話，咁就一定係PSVR ！

人到中年，打幾個鐘 VR 真係唔掂

總結

雖然單人模式總關數有 20 版，但係大型敵機就只係得一架，呢一點係有啲啲到喉唔到肺，不過一啲都冇損害《Ace Combat 7》比玩家嘅樂趣，當然佢嚟緊出 DLC 再加多幾版有舊作嘅大型空中要塞就更加過癮。然而如果你從來未玩過《Ace Combat》系列嘅新玩家，《Ace Combat 7》呢隻可以話新手老手都適合使用嘅空戰遊戲，新手易上手而老手又有驚喜，當然你有 VR 去配合玩就更好 Feel。

依家我就努力試埋多人對戰模式，如果仲有新驚喜嘅就再同大家分享。