八、九十年代既香港電影一直非常有特色，亦都令好多人對香港呢個地方充滿興趣，當中更曾經推出用香港做背景既遊戲，好似《九龍風水傳》、《Sleeping Dog》等等。黎緊又會推出一隻以香做背景既遊戲《The Hong Kong Massacre》，不單只遊戲背景係香港，連整個遊戲風格都充滿住吳宇森電影既味道，齋睇都覺得正！
《The Hong Kong Massacre》由瑞典獨立遊戲開發商 VRESKI 製作，係一隻採用俯視角度既 2D 射擊動作遊戲。製作團隊受到香港經典槍戰電影既啟發，所以係遊戲內種種地方都會滲透住果種香港味。故事背景就當然係香港，而橋段亦非常之港式。玩家將扮演一位前警探，為咗向殺死自己拍檔既兇手復仇而上路。另外玩家係遊戲入面會見到大量《英雄本色》式畫面，慢動作、飛身閃避、雙槍（無限彈）一應俱全，不過就唔係好覺眼有白鴿。
跳過對面樓呢下真係好港式電影
舊式茶樓內既對戰
遊戲另一特別之處就係系統既設定，敵人同玩家都並無血條設定，因為每一發子彈都係致命既。亦都因為呢個原因，所以大家必需善用「慢動作」呢個系統。玩家使用「慢動作」既時候就可以閃避子彈，不過呢種能力係有限，大家需要好好咁善用呢個系統先可以打出漂亮既連殺。
子彈軌跡處理得非常之漂亮
《The Hong Kong Massacre》已經推出，對應平台為 PS4、Nintendo Switch 及 PC，支援繁體中文。
《The Hong Kong Massacre》 Steam 傳送門
VJGamer總編，細細個已經蒲機舖，機齡甚深，熱愛電玩文化。