講完《2018 年最伏遊戲》就係時候講返《2018 最佳遊戲》，今年我地改一改型式，轉為每個界別由各編輯投票，再選出一隻心水之作。而我地編輯部喺連日商議（？）之後得出嘅結果如下，唔知你地又玩過當中幾多隻，你又認唔認同我地嘅想法？當然，遊戲好無玩多多少少同每人喜好有關係，我地一齊黎睇下結果啦～
【2018 最佳遊戲】《Monster Hunter World》
至今難忘遊戲推出之時，成個 PSN Online 用戶畫面都係玩緊《MHW》嘅畫面；雖然好多《MH》舊玩家一直都話《MHW》同傳統《MH》係兩回事，但係《MHW》靈活多變嘅動作模組其實係做得相當好的，加上遊戲嘅持續營運、不斷增加難度、定期舉行活動、喺武器上面不斷作出數值調整等等，都可見遊戲嘅誠意。
雖然遊戲而家熱潮消退不少，但係 2019 年 G 位任務開放之後，相信又會再次掀起一輪新嘅風潮！
至於點解唔係《Red Dead Redemption 2》，嗯……《RDR2》嘅劇本係出色，配樂係精彩，開放世界亦都真係好大，好多元素可以發掘；之不過動作操作上面始終無《GTA V》咁生動精彩，而佢嘅 Online Beta……又真係未出色到令人驚艷讚嘆，所以「最佳遊戲」我地都係揀左《MHW》。
（投票結果：《Monster Hunter World》6票、《Red Dead Redemption 2》2票）
延伸閱讀：
【新手MHW獵人日記】第一章：「對唔住，我貓車」
【新手MHW獵人日記】第二章：「只要不被打中，就沒有什麼大不了！」
【新手MHW獵人日記】最終章：「打完冥燈又如何，而家先係遊戲嘅開始……」
【新手 MHW 獵人日記】新春番外篇：「歷戰難打？麻痺蛙先係 BOSS 呀」
【最佳動作/冒險遊戲】《Monster Hunter World》
無錯，呢個範疇我地都係認為應該比《MHW》的，今年動作型冒險遊戲非常多，包括《Spider Man》《Assassin’s Creed: Odyssey》甚至年尾推出嘅《審判之眼：死神的遺言》，點解我地都仲係會揀《MHW》，就係因為遊戲裡面多變嘅遊玩方式。
遊戲講求玩家之間嘅合作性與及協調，獵人玩家們每場戰鬥都唔可以淨係用一樣嘅方式去攻擊，反而要睇大圍表現係點、從而執生變通。呢種動作靈活度令《MHW》比起其他單機遊戲多左一分深度……我們是這樣認為的！
（投票結果：《Monster Hunter World》4票、《Dead Cell》3票、《Spider-Man》1票）
【最佳格鬥遊戲遊戲】《Dragon Ball Fighter Z》
以格鬥遊戲黎講，《Dragon Ball Fighter Z》可謂實至名歸。除咗推出至今仍然大受歡迎之外，係過去既世界最大型格鬥比賽 EVO 更力壓《SFV》成為最多參賽者報名項目。遊戲節奏極為快速，而且拳腳招式間差唔多每下都係陷阱，係二位之間既攻防戰令觀賞者都會覺得緊張刺激。
而同樣地被玩家期待甚久既《Soul Calibur VI》，各方面都表現不俗，可惜無法吸引太多新玩家加入，導致遊戲無法 hit 起上黎，極為可惜。
（投票結果：《Dragon Ball Fighter Z》6票、《Soul Calibur VI》1票、《Street Fighter V AE》1票）
【最佳射擊遊戲】《Battlefield V》
其實《Battlefield V》都真係贏個馬鼻，以遊戲內容黎講，大部份宣傳時睇落好吸引既模式都未有得玩，地圖、槍械甚至係載具都可以話係寥寥可數，而且單人故事模式玩法千篇一律，Hea到爆。都唔講遊戲內充滿住大大少少既 BUG（其實集集BF都有BUG架啦）。
不過講到遊戲既射擊感，爽快度呢啲射擊遊戲最重要既元素，佢都可以滿足到你，而且呢類大型合作射擊遊戲如果你唔玩佢，老實講都無乜選擇。當然今年既《Call of Duty: Black Ops 4》亦都非常出色，雖然刪除咗故事模式，不過新加入既食雞 Mode 不但精簡化，同時亦都令遊戲節奏變得快速，好少會出現執槍執你幾十分鐘幾情況。另外喪屍模式仲非常有 Heart，成隻 Game 真係抵食夾大件，如果陣係話輸比《Battlefield V》既地方，應該就係果種多人對戰既戰爭感。
最後就係好少人提既《Strange Brigade》，呢隻黑馬推出之後曾經試過賣斷市，遊戲內既持久戰仲非常好玩添，如果湊夠四隻腳的話，絕對值得一試。
（投票結果：《Battlefield V》4票、《Call of Duty: Black Ops 4》3票、《Strange Brigade》1票）
延伸閱讀：
【遊戲感想】唔怕豬隊友，只怕無朋友《Strange Brigade 異國探險隊》激好玩四人合力冒險記
【最佳角色扮演遊戲 】《二之國 2 王國再臨》
可能你會話「點解唔係《Xenoblade 2》！」或者「點解唔係《八方旅人（Octopath Traveler）》！」，放心，我地明，因為以上問題喺編輯部出現過好多次。
最後之所以挑選咗《二之國 2》作為「最佳 RPG」，原因係：遊戲喺動畫、幻想、RPG 多元開放世界、人性描寫等方面，都取得一個好好嘅平衡。
至於備受我地好評嘅《八方旅人》，係，佢係勁嘅，用 Unreal Engine 4 整 3D 風嘅 2D 彷點陣圖畫面，配樂又好聽，但係佢嘅故事始終係八個人分開，淡淡交會過各不留下印，玩家嘅身份就好似只係一個「監察者」而唔能夠真係代入去故事入面。
所以……《二之國 2》萬歲。
（投票結果：《二之國 2》5票、《八方旅人》3票）
兩篇感想文如下：
【遊戲感想】《二之國 II》絕對係 2018 年 RPG 近乎完美之作
【遊戲感想】《OCTOPATH TRAVELER 八方旅人》故事平淡但當中有你～實而不華 2018 佳作之一
【最佳文字遊戲】《秋之回憶 8 – 告別回憶 無垢少女（メモリーズオフ-Innocent Fille-）》
呢個遊戲得神婆玩過，而編輯部聽完神婆講完就當自己玩左嘅緣故……所以基本上係無痛當選（喂）
作為一個有返咁上下歷史嘅遊戲系列，今次《秋 8》嘅收尾算係做得令玩家非常難忘，人與人之間關係嘅糾結、峰迴路轉嘅劇情，都令人好投入到故事入面；雖然繁體版本偶有字形誤植嘅地方，不過都係可以包容嘅小問題。
（投票結果：《秋之回憶 8》8票）
想睇返神婆篇感想文可以去呢度：
【遊戲感想】沉淪・貪戀與執著《秋之回憶 8：Memories Off -Innocent Fille-》系列最終章糾結而扭曲
【最佳運動遊戲】《Forza Horizon 4》
Xbox 自家主力作品系列最新作，以賽車遊戲黎講《Forza Horizon 4》真係好玩兼抵玩。今集遊戲加入四季季節轉換元素，亦即係話一條賽道會有四個版本，如果有積雪又或者落雨的話，賽道物理效果會即時反映出黎。而本作係街道賽黎，玩家可以自由設定自己既比賽賽道，係線上見到其他玩家時可以邀請對方即時鍊返場，都幾快樂！
當然遊戲仲有好多其他元素，例如可以買地標、買車買衫等等，係賽車遊戲愛好者的話，為《Forza Horizon 4》買機絕對唔會後悔。
（投票結果：《Forza Horizon 4》4票、《PES 2019》1票、《FIFA 19》2票、《Mario Tennis Aces》1票）
【最佳線上多人遊戲】《Monster Hunter World》
無錯，又係《MHW》。
雖然唔少資深獵人都發現隻抽係簡單過多人連線，但係大部份玩家都係選擇同朋友一齊屠龍。而線上遊戲最重要既部份莫過於想同朋友線上連機玩，而《MHW》完美咁實現到呢點，實至名歸。（其實《Destiny 2: Forsaken》都好正，不過成日唔夠腳囉 ）
（投票結果：《Monster Hunter World》4票、《Destiny 2: Forsaken》2票、《Fortnite》2票）
【最佳合家歡遊戲】《Overcooked 2》
合家歡遊戲，即係一家大細坐埋一齊玩既遊戲。相信係呢個範疇《Overcooked 2》拎到都無人有異議。
《Overcooked 2》由未推出時已經極受各方注意，到推出後瘋靡萬千媽咪，仲有唔少情侶因為呢隻遊戲出機（據聞都好多人因為呢隻 Game 而分手），雖然後勁不繼，但係依然無損佢係今年最佳合家歡遊戲既地位。
（投票結果：《Overcooked 2》6票、《Super Mario Party》2票）
【最令人喜出望外遊戲】《The Missing: JJ Macfield and the Island of Memories》
講到出人意表，《The MISSING: J.J. Macfield and the Island of Memories》真係贏晒。
一直以黎無論咩類型遊戲都好，絕大多數都係要你盡量避免受傷、遠離危險，總之就係竭盡所能咁去避免死亡，呢個亦係大家根深柢固既慨念。
不過喺《The MISSING: J.J. Macfield and the Island of Memories》入面，就完全顛覆呢種固有遊戲玩法，玩家想過關就必需先自殘！
遊戲內玩家經常要自殘，利用自己既斷肢又或者係唔同既狀態去解開大大少少既迷題。遊戲長度適中，故事亦幾有驚喜，錯過咗既朋友絕對要試下。
（投票結果：《The Missing: JJ Macfield and the Island of Memories》4票、《Spider-Man》3票、《Starlink: Battle for Atlas》（1票））
遊戲相關介紹：
《The MISSING J.J.》顛覆固有遊戲玩法 想過關必先自殘！
【最佳獨立遊戲】《Dead Cells》
之前都喺我地嘅 Review 度講過，如果《Bloodstained: Ritual of the Night》今年出唔到嘅，《Dead Cells》佢年尾必定有獎。雖然動作遊戲方面今年真係多到玩唔晒，但獨立遊戲作品入面佢除左故事比較上薄左少少之外，真係冇乜大挑剔。
你仲未玩過而又想搵隻動作 Game 消磨下最少一個星期冇新 Game 啱玩嘅空窗期，呢一百幾十蚊比個機會《Dead Cells》。
（投票結果：《Dead Cells》7票、《Steel Rats》1票）
感想文如下：
【遊戲感想】M屬性頂級無間自虐動作遊戲 Dead Cells
【最佳重製遊戲】《DARK SOULS Remastered》
近年黎重製經典舊作已經成為趨勢，今年眾多重製遊戲入面，獲得我地編輯部最多票數既遊戲就係《DARK SOULS Remastered》。除咗遊戲本身已經做得好好之外，重製之後可以穩定輸出 1080p@60FPS，令到成個傳火過程更加爽皮。亦都係致勝既主要原因。
當然 《Bayonetta 1 & 2》合集亦都非常出色，合集包含埋極少人玩過嘅 2代，真係良心嘅表現！！LOL
（投票結果：《DARK SOULS Remaster》3票、《Bayonetta 1 & 2》2票、《Age of Empires Definitive Edition》1票、《Rockman X Collection》1票、《Street Fighter 30thAnniversary Collection》1票）
延伸閱讀：
【遊戲速評】《DARK SOULS Remastered》Switch 版面世！到底同 PS4 版差幾遠？
【遊戲感想】《Bayonetta 2》當年落 Wii U 真係好可惜（喂）
【最佳手機遊戲】《Sdorica》
雷亞出品既 RPG 類型手機遊戲，以豐富故事內容及富有深度既戰鬥系統取勝。遊戲雖然線上同朋友既互動性極低，但係其他方面完全咁彌補呢個問題。最近更新後，更暗示劇情進入黑化階段，令人更期待來年既表現。
另外《第五人格》、《荒野亂鬥》表現亦都非常出色，二隻遊戲均呈現手機遊戲新方向，相信係 2019 年手機遊戲市場將會更加熱鬧。
（投票結果：《Sdorica》3票、《荒野亂鬥》2票、《第五人格》2票、《PUBG Mobile》1票）
【最佳劇本】《Red Dead Redemption 2》
最佳劇本應該比邊個遊戲，呢一點喺我地編輯部爭議左好耐；神婆為首嘅女子隊好堅持係見證大叔的愛嘅《Detroit》，但係總編話唔可以比 VJGamer 新年流流就腐化，所以終於成功令到《RDR2》得到劇本分類第一名。
平心而論，《Detroit》係好出色，亦係我地一致認同 2018 年必玩之作之一，不過，講到劇本深度、人性刻劃、以及遊戲成個流程令玩家個心有幾唔舒服嘅話……《RDR2》遊戲裡面 Arthur 經歷嗰種無力嘅人生，以及「本來無一物」嘅虛無，呢個劇本簡直係《RDR2》成個 Game 嘅靈魂。
（投票結果：《Red Dead Redemption 2》（5票）、《Detroit》（3票）
延伸閱讀（呢篇感想係老闆親自執筆！！LOL）：
【超劇透慎入】《碧血狂殺2（Red Dead Redemption 2 ）》的俠以武犯禁
【最佳美術】《Detroit》
雖然我地好認同《八方旅人》利用現代 3D 技術去製作 2D 復古風畫面係非常出色，但係如果以視覺效果搭配遊戲整體黎做評分標準的話，我地最後係揀咗《Detroit》的。無論係擬真嘅角色模組、自然角色演譯、畫面光線材質貼圖、以及最重要嘅「氛圍」，《Detroit》正如我地當時篇感想文形容嘅一樣：係一件藝術品。
充滿電影既視感嘅畫面，帶出寂寞，帶出空虛，帶出恐懼，帶出玩家各種聯想。我地到而家都認為《Detroit》係今年必玩嘅作品之一。
（投票結果：《八方旅人》（2票）、《Assassin’s Creed Odyssey》（2票）、《Detroit》（4票））
延伸閱讀：
【遊戲感想】《DETROIT Become Human》唔玩會後悔。2018 遊戲界最佳藝術品
【最佳持續營運遊戲】《Rainbow Six Siege》
一隻 2015 年推出嘅遊戲，去到而家仲係不斷有新人玩家加入、官方仲係繼續有更新地圖同埋新角色、搞《R6》比賽都仲係會有好多隊伍踴躍參與……薯唔薯仔 Server 呢啲衰野，新年流流我地唔講！但係講到最佳持續營運，《R6》實至名歸！
（投票結果：《Rainbow Six Siege》（6票）、《Fortnite》（2票））
【最佳遊戲配樂】《八方旅人》
好多遊戲都有出色配樂，但係到底係聽完就算，定還是酒過三巡後依然纏繞於心，又或者係「一聽到就諗起個遊戲畫面」呢？我地認為《Octopath Traveler》成功做到以上一點，每個角色、場景都有自己獨有 BGM，一張 Soundtrack 絕對係遊戲以外最值得收藏嘅精品。
《RDR2》嘅配樂都做得好好，特別係 Arthur 回家鄉，嗰一幕，千山萬水，唯美得叫人有點心痛，不過……Overall 黎講佢嘅配樂留低嘅「記憶」唔夠《八方》嘅強，所以就比《八方》取得呢個回合吧！
（投票結果：《Red Dead Redemption 2》（3票）、《八方旅人》（5票））
唔知我地嘅內部票選，又同你今年心中嘅評價分別大唔大？大家睇緊呢篇文嘅時候，已經係 2019 年啦，如果大家想留意返 2018 年有無咩作品自己玩漏，可以拎我地呢個評選黎做參考（笑）
最後祝各位新年快樂，2019 年，希望大家同我地一齊繼續玩多啲好 Game！