我相信對《絕體絕命都市 4》期待極深如我嘅玩家，本身一定都有玩過前作。《絕》作為市面上少有嘅災難求生遊戲，過去嘅舊作都喺玩家之間有很高評價；奈何日本天災連環，《絕 4》一次又一次自肅、延期，由 2010 年冬季，待到 2018 年嘅冬季，呢隻遊戲，我等左起碼八年。

當我興高采烈地接到遊戲，入 Game，準備好面對再一輪嘅求生挑戰時……我失望了。「失望」或者都唔足以形容我嘅心情，因為，除左失望，仲有嬲，以及無奈。

以下遊戲感想文包含劇透，不過我亦好老實話你知，呢個遊戲早啲劇透比你知都係好事，因為遊戲，係一隻用左好多年製作、好努力地玩膠嘅作品。如果你係抱住獵奇心態、或者一心惡搞嘅心態去玩《絕體 4》，咁我相信你會有好多可以吐糟尋樂嘅空間。

《絕體絕命都市》以往之所以好玩，係因為佢真係教到你求生技巧，同時，喺遊戲中與其他角色嘅互動，亦有可能影響你嘅未來。

當年喺《絕體絕命都市 2》入面，「角色互相影響命運」嘅玩法新穎而真實，例如我喺第一個角色時已經拎走哂啲資源，下一位角色黎到時就咩都執唔到，但可能會發現一啲第一位角色時見唔到嘅新道具。

黎到《絕 4》，可以互動嘅角色本來就唔多，而每個 NPC 本身嘅故事性以及存在感都非常薄弱，啲劇情有少少夾硬黎，例如以下呢一位，某 IT 公司嘅霧島社長，出面地震塌樓，但係佢間公司啲人居然都仲可以喺度做緊野。

主角之後有錢嘅，可以買起佢對家間公司。無錯，你無睇錯，係「買起間公司」，因為喺呢個遊戲入面，搵錢係易過借火的，容易到……我都唔知官方到底當玩家低能，定係覺得將啲 NPC 設定為弱智會好有樂趣了。反正，喺遊戲中同啲 NPC 講下野，就可以隨街買賣地產業權、以及輕易叫人比錢你咁樣。

我去到爆機時身家有成一億。

我之後仲走返去同呢位霧島社長講「喂我買起左你對家公司嘅股份，Now we are rivals」然後一齊飲返杯添，雖然我唔知道呢段劇情同地震有咩關係，亦唔知我係幾時開始同呢位社長做左朋友。Anyway。

正因為搵錢好易，所以，明明呢個係災害遊戲，但係玩家根本不愁糧水的，只要你有錢，就算啲便利店發死人財，一枝烏龍茶賣到成 5,000 日元又有咩所謂？老娘有的是錢（喂）

食完杯麵會勁口渴……你係幫緊合味道賣廣告定倒緊佢米？是但啦，我大把糧水（喂）

以前嘅《絕》入面，你要搵餐死先搵到即食杯麵、麵豉湯呢啲食物（仲要到左超危急關頭先捨得食），而喺《絕 4》入面，基本上便利店多野賣到你個袋裝唔落，仲有我唔明，點解周圍交通斷哂，但係便利店班人都仲可以運到唔同口味嘅新鮮便當返黎賣，點解……

走難，但係去到邊都有充足糧水，唔怪得之日本啲網友吐糟吐到癲。

遊戲中會遇到樣衰核突假店長狂發死人財，賣野賣到極貴

然後，今集官方話要加強難度，所以增加咗「需要去廁所」呢個機能。

難度？難條毛。遊戲裡面每個場景又細又短，而每個場景入面，無論燒到炭黑又好，極污糟都好，點都會有廁所比到你；我直至爆機，根本未試過感受「因為急去廁所而產生壓力」呢一樣野，增強難度，到底難左喺邊呢？

反觀喺舊作入面，「濕身同埋凍會扣 HP」呢樣最真實嘅系統，今集反而移除左，WHY！我可以著住迷你裙、高踭鞋踩落水跑步，但係完全唔會扣 HP，亦唔會有疾病風險，你居然仲好意思話「加強難度」？以前我地一搵到保暖貼即刻拎黎救命架！

男玩家我唔知，女玩家見到呢啲廁所真係去得落？

如果你話遊戲嚴重降低難度我就信。

講明係災害求生，我原本期待遊戲中係危機處處，例如會漏水、會漏電、會火災等等。不過，除咗頭幾個章節比較多「餘震」要行慢兩步之外，去到遊戲中盤，我所面對嘅，全部都係喺遊戲製作上慳水慳力嘅人事問題，例如幫髮型師搵較剪、阿婆受傷要揹佢搵醫院呢種劇情。

唔係話幫人唔好，只係遊戲中「逃離災害」呢個元素真係太薄弱，基本上我喺遊戲中遇到嘅問題，都係黎自「人」；而我又好老實，你整一堆 NPC 追殺我有幾難，但係如果我只係為左無厘頭地比 NPC 追殺，我駛乜玩你？我去玩其他 Action Game 唔好？起碼有難度吖。

劇情超單薄係《絕 4》致命傷，因為劇情無高潮無驚喜，所以你要整幾個驚嚇位出黎係咪？例如為左體現災害中人性無情，你先係要我做邪教教主，去帶人入教，然後轉過頭呢班教徒走黎追殺我，做乜野啫……

踢人入邪教 Play

全個遊戲得 18 個場景，而好多場景係重覆使用的，目的就係為左要玩家去同啲 NPC 進行一啲無營養嘅對話，營造一種「人情味」以及「劇情有首尾呼應」嘅假象（例如同設計師 アケミ 傾完計，我就可以買到化妝品，喂出面到底係咪天災緊？點解主角會有心情慢慢揀眼影同唇膏？）

遊戲雖然要玩家收集指南針，不過指南針嘅種類以及位置，相比前作真係馬虎得多，完全唔需要用腦就拎得到，探索過程頗為單調，基本上所有地方都係一條直路而已。

NPC 到底比到啲咩玩家呢？舊作入面，玩家好多時可以選擇「救／唔救」啲陷入危險嘅 NPC，但係《絕 4》入面，基本上你係無乜得揀的，大部份出場嘅 NPC 都有安排好嘅戲份，所以係逼你做好人，唔救就推唔到劇情。

呢個就係問題所在了。點解要限制玩家於一個求生遊戲入面嘅選擇呢？工作室前排話「花左好多時間喺遊戲嘅對話選項上面」，但係，好老實講，絕大部份嘅對話選項於遊戲中根本毫無意義，一來唔會加減 NPC 好感度、二來呢啲選項，有好多係刻意玩無厘頭，亦有好多對話，根本係打發緊遊戲中無趣嘅劇情。

你唔好以為黑紙白字咁同玩家講幾十句野，個遊戲就叫有劇情啦好無？

我就算知道哂成間 Pizza 店裡面嘅人事關係，對個劇情又有咩幫助先？

仲有我諗唔明，點解要加插 NPC 笠原弥生比兩個男人強暴嘅情節？遊戲入面幾次出現「男性想對女性動歪念」嘅劇情，但係惟獨係呢啲劇情，你點樣揀選項都係改變唔到結果的。製作人，我都好想知道你多次安排呢種劇情係出於咩心態……

見到佢比人老強嗰一段我真係嬲到極點（重點係劇情根本唔比我救佢，痴線）

仲有以下呢個 NPC。人地《絕 3》本条咲唱歌令人難忘，係因為佢係女主角，佢有劇情，佢唱歌有意義；你唔好黎到《絕 4》搵個大眾臉 NPC 出黎唱兩句就以為可以玩情懷啦，玩家真係無你想像中咁蠢架……

然後呢個唱歌嘅女性 NPC，唱唱下歌比男人調戲抽水。呢個遊戲係咪好想得罪女權份子？日本唔興 #metoo？

然後，終於講到結局。

結局得兩種，很 Hea ，很無厘頭；我好後悔我居然一度以為「總有一個結局係有意義的」。

「飛機場 End」：結果係販賣人蛇 Play，玩家要即刻整炸彈先可以走佬，走完佬就會發現同行者裡面，原來有人係國際刑警，用豆豆槍一個打十個，獨力打倒壞份子。

零難度嘅逃亡

身手勁過桐生一馬

玩完呢個九唔搭八嘅結局，咁第二個「市政局 End」我諗住應該係正常逃生結局，點知最後變左暴動 Play，啲暴民會無啦啦逼你去抗爭，然後主角最後比人以反動罪名拉左。

我望住個爆機畫面，我個心好 Lost，我真係心諗，我在玩三小……

我無諗過呢隻等左八年嘅遊戲會差成咁，明明而家資金更多、技術更好，如果你話《絕 4》係怕太認真嘅劇情會令日本當地曾受災嘅人士感到不快嘅話，咁你要自肅，倒不如如當年所講，直接中止開發遊戲算了，Fans 係可以理解的，而唔係好似而家咁，將呢隻有口碑嘅遊戲，變成無意義嘅惡搞向遊戲。

老實講，遊戲入面嘅惡搞我係唔覺得好笑的，因為要用咁多九唔搭八嘅野黎充撐劇情，只係變相說明左遊戲本身個劇本空無一物，淡而無味罷了。

《絕體 4》還好嗎？不，一點也不好。

《絕體絕命都市 1～3》集各界玩家都給予很高評價的，如果你想真正認識呢個系列，強烈建議你搵返舊作黎玩，唔好介意畫質陳舊，因為舊作嘅遊戲性極高，值得一玩。

至於今集《4》，或者，喺經歷完《巨影都市」之後我就應該醒覺，IREM（舊作初始工作室）已經不在了，做出極為細緻而有層次的《絕體絕命都市》的那個工作室，早就變了樣了。

我好少將一隻遊戲講到咁體無完膚，如果你問我「《絕體絕命都市 4》值得玩嗎？」，我諗，我會答你，市面上仲有好多值得玩嘅遊戲，除非你好鍾意玩無厘頭嘅遊戲……。

2019.10.30 新增：因為《絕體 4》中文版已經上市，中文版翻譯做得非常好，將遊戲裡面所有日文睇都已經好白痴嘅對白，都好精準咁翻譯過黎。

既然遊戲係玩膠，我當然係盡全力惡搞

中文化做得係用心嘅，小至便利店裡面嘅雜誌，大至路上廣告牌，一律換哂做中文或者台式風格；不過遊戲 Loading Time 頗耐以及 Drop Frame 問題嚴重等情況，並無因為中文化而有明顯改善，各位玩家多多包容啦。