曾開發《真女神轉生》及《PERSONA》等知名 RPG 系列嘅 ALTUS，剛剛就宣佈旗下另一新作《十三機兵防衛圏》將中止開發 PSV 版本，令遊戲變相成為 PS4 獨佔作品；同時發售日期亦由原定的「2018 年內」更改為「未定」，似乎將會成為無限延期嘅「待望作品」。

自從 PSVita 因為業餘不理想所以中止開發之後，越黎越多遊戲已捨 PSV 平台，改為考慮 PS4 獨佔或登錄 Switch 平台；不過目前《十三機兵防衛圏》尚未有 Switch 向的打算。

《十三機兵防衛圏》由曾經開發《Odin Sphere》以及《朧村正》等作品嘅 Vanillaware 工作室擔任製作，以現實世界作為舞台，玩家以 13 位少年少女嘅視點去推展故事。

根據遊戲於去年九月公佈嘅宣傳片黎睇，13 位主角似乎「被挑選」去對抗世界崩壞，負責操控械人去對抗未知嘅敵人。遊戲畫風哀愁而綺麗，採用仿 2D 捲軸風格嘅移動模式，戰鬥風格似乎並唔係傳統嘅即時戰鬥或回合制，不過詳情還有待官方公佈。

13 位主角之間互動嘅情感交集亦會交織出唔同支線，然而遊戲由始至終瀰漫住一種絕望無助感，相信劇情方面亦是遊戲賣點之一。

官方為咗「集中 PS4 平台遊戲開發質素，亦想比到玩家最完美嘅體驗，所以發售日期目前就唔講住」。

的確，呢個遊戲自舊年九月公佈以來，一直聽唔到相關消息，原本我都好擔心到底點樣可以趕及 2018 年內推出。ALTUS 出品好少會有崩壞作品，亦好少作品會爛尾，所以身為玩家，我都願意多等一陣去迎接最完善嘅《十三機兵防衛圏》。

不過，我都好想知 ALTUS 幾時會公佈《真女神傳生》新作嘅最新消息……