「神奇大帝穿左個窿~娶左三位妾侍~有個靚、有個痘皮、有個斷氣就黎死~ 」唱得出呢首歌嘅，喺動漫界都應該有返咁上下資歷。宇宙大帝前排又再出左超合金，而本地唔少高手都襯呢個時候整返隻宇宙大帝去賀一賀。但云云眾多嘅大帝入面，以下呢隻真係不得了。

宇宙大帝 Space Emperor God Sigma by Anthony Lee

海鳴王、空雷王、陸震王

同隻合金擺埋一齊就見得到 LEGO 版本嘅還原度！超晒班！

嚟自 Anthony 呢隻近半米高嘅宇宙大帝完全唔係得個樣啊，接近二千五百件砌成，分體合體做到足，而且熟識宇宙大帝嘅玩家都知，唔只係空雷王、海鳴王同陸震王三隻合埋就係，仲要加埋隻巨神飛翼先完整。Anthony 呢隻當然冇偷雞，整到出嚟亦如原版一樣套落去，變成大帝嘅胸前同背後飛翼。

而且  Anthony  喺製作嘅時候都堅持要盡可能將所有嘅 Studs(顆粒) 都收得靚靚，務求要做到全光滑表面，就係因為呢個堅持，搞到要喺世界各地去訂組件返嚟，結果足足搞左成個月先齊件完成。最終就算分體定合體版本，都完全冇偷功減料，呢份堅持促成呢隻咁完美嘅宇宙大帝。

正面、背面都堅持做到一粒釘都見唔到！

宇宙大帝雖然已經擺左上 LEGO Ideas 去集 Support，儘管作品幾吸大家嘅眼球，但 Anthony 都擔心玩家們對 LEGO 製機械開始有啲滯，加上 LEGO 百獸王珠玉在前，所以都希望大家唔好吝嗇每一個支持！可以將 Anthony 嘅宇宙大帝推到上一萬 Support。

Anthony 宇宙大帝 LEGO Ideas 傳送門