即將於 2018 年 12 月 7 日推出嘅《任天堂明星大亂鬥特別版》終於宣佈哂所有可使用角色，最新公佈角色包括《街霸》嘅 Ken 以及《Pokemon》嘅熾焰咆哮虎（ガオガエン）。

加埋呢兩個角色之後，遊戲推出之時可使用嘅遊玩角色一共有 74 位，但係都仲未止，官方話之後仲會推出 DLC「Fighter Pass」（2,500 円未連稅），包括五隻新角、五隻支援、背景音樂等內容，不過 DLC 有啲咩角色目前就未公佈啦，預計呢批 DLC 會喺遊戲推出之後一年內陸續推出。

至於本文頂嘅 Mario 食人花，係遊戲嘅早期購入特典，如果想入手嘅朋友記得預訂遊戲啦！

兩位新角登場片段：

官方亦公佈咗一堆全新輔助角色，比較令我驚喜嘅係居然有當年登錄於 Wii U 所以好多朋友都無玩過 嘅《零 〜濡鴉ノ巫女〜》主角「不来方夕莉」，即係點，拎住相機做靈力攻擊？

新輔助角色登場片段：

講起《大亂鬥》相信唔少玩家都會諗起 Amiibo，官方仲宣佈：今次遊戲入面所有全新登場嘅可使用角色，都會分批推出全新 Amiibo，唔知有無勇者決心要課金課到世界盡頭、入手哂所有新登場 Amiibo 呢？

最後不可不提嘅呢個功能，唔知大家又點睇。一直無 Party Function 嘅 Switch 即將為《大亂鬥》推出手機連攜 App，玩家可以自己開房同朋友對話，不過呢個 App 目前就未開發完成，遊戲 12 月推出，個 App 就預計要 2019 年頭先推出；同埋，如果係用電話黎做 Party 嘅，咁其實用 Discord 好似都已經解決咗呢個問題……。

呢個 App 用處有幾大，似乎需要再留意一下。

以上資訊來自尋晚舉行嘅「Super Smash Bros. Ultimate Direct」，有興趣睇返完整片段嘅朋友，可以睇呢度：