由 Chucklefish 發行的獨立模擬農村經營遊戲《Stardew Valley》自 2016 年 2 月喺 Steam 上面推出之後大受歡迎，唔單止拎咗 2016 年 National Academy of Video Game Trade Reviewers 嘅最佳模擬遊戲獎項，IGN 更加比出 8.8 分嘅高評分；後來遊戲更喺 PS4、XBox One 及 Switch 平台上架，而今日，遊戲亦會原汁原味地登錄埋手機平台，售價 HKD 58。以一隻 Indie Game 黎講，《Stardew Valley》走勢絕對強勁！

今日已上架（圖為香港 Apple App Store）

玩家於遊戲中飾演嘅主角，接手咗爺爺嘅農場，為咗令農場再次繁盛，主角決定遠離都市繁碌工作，開始經營農場嘅生活。雖然遊戲帶有強烈《牧場物語》嘅影子，但係口碑依然強勁，相信絕對有佢嘅獨特之處。玩家唔止要種菜養牛，亦可以釣魚採礦等等；同時，你亦要同鄰里打好關係，因為建立人際關係亦係遊戲重要要素之一！遊戲玩法其實相當自由，係一隻非常有彈性嘅模擬遊戲。

雖然畫風簡單、遊戲玩法聽落亦好易上手，但係《Stardew Valley》絕對係一隻頗具深度而且耐玩嘅遊戲，2016 年 2 月 Steam 版推出之時，一個月內已經售出 100 萬份，而呢個數字隨住遊戲登錄更多平台之後，當然係繼續穩步上升中。

手機版目前只對應 iOS 版，Android 版會在稍後時份公佈上架日期。有興趣嘅朋友可以參考以下呢條 Trailer：