相較於市面上所講，八方旅人只係八個旅者毫無交集既故事，其實完全錯哂。八方旅人講緊既一直係一個有相同主題，而且連貫既故事。相信已經玩左爆機隱藏迷宮既人已經大概知道我想講咩，不過SE 竟然夠膽將個世界既編年史淨係寫落本官方攻略度，真係唔買既話，好大程度唔知之前發生緊咩事。

咁Octopath Traveler 究竟講左咩故事？以下完全劇透注意

故事要由神名曆元年，即係遊戲故事開始既1600 年前講起

聖火神Aelfric 降臨大地，為大陸帶來聖火，再將黑呪神ガルデラ (真係搵唔到英譯) 封印，連ガルデラ 個名都比眾神從世上抹去。而眾神亦因為同邪神大戰後受傷，返左去神界休息。(呢度係Cyrus 故事既Trial of Twelve VIII 上面有講過)

於是聖火教會就因此基礎成立，及後搵到散落係大陸各處既聖火，就係上面開教堂。直至神名曆700 年，教會既人終於發現原本大戰既地方，搵到原初聖火，於是開始左每20年一次既傳火之旅。

1350 年，係High Land 既一個學者，Solomon 係Dusk Burrow 附近發現左Gate of Finis 既存在 (即係Cyrus 第四章去果個遺跡) 經過一輪研究之後，終於完成左From the Far Reaches of Hell，並得到ガルデラ 既啓示……..跟住痴左線

1401 年，Solomon 終於打開左禁忌既Gate of Finis，將Lyblac 釋放到人間。

大家應該有見過Lyblac 架，大概係咁樣︰

Beowolf 當時同大賢者Odin Crossford 一齊，遠征東方攞到龍石之後再次將Gate of Finis 封印。

(冇錯，就係Therion 要攞返果幾粒龍石)

同年Beowolf 建立Hornburg 並將龍石交比第一任Lord Ravus 看管，佢地家族於是世世代代擔起保管龍石既責任。

1503 年，聖火教會入面既一個我地而家叫Mattias 既司祭，同Lyblac 見面，並且得到不死之力，100 年後佢同Simeon 一齊建立左黑曜會。

1594 年，Lyblac 以鉅額委託Werner 去推翻Hornburg。

1603 年，受到From the Far Reaches of Hell 既知識所引誘既Yvon，係Lucia 既誘導下，同Lyblac 接觸。Yvon 為左偷走書庫入面既譯本，殺左當時既院長，成為而家既院長。

1606 年，Graham Crossford 為左醫治妻子既重病，四出尋找救藥。

1608 年，Graham Crossford 既妻子逝世，Lyblac 睇上有Crossford 大賢者血統既Graham，以死者復生作利誘，引導佢去Gate of Finis。同年，Azelhart 家主Geoffery 因為清肅緊領地內黑曜會既活動，招致仇殺。同一時間，現任Lord Ravus 身故，黑曜會趁亂搶走所有龍石。

1610 年，因為Werner 既擾亂，Hornburg 終於滅亡。

1612 年，Lyblac 借助Graham 既血統同埋黑曜會搶返來既龍石，嘗試再次打開Gate of Finis。Graham 借助對妻兒既思念而打破儀式，重傷Lyblac 之後慢慢變成Red Eye (即係我地Hannit 要獵果隻野)

1618 年，遊戲故事正式展開

由此可見，遊戲其實主要分四條線

其一係Graham Crossford 既筆記同藥，分別啟發左Tressa 同Alfyn 去追尋佢既腳步，成為一個冒險者。

其二係Hornburg 線，Olberic 苦苦思量，最後終於明白自己國破家亡既原因。Cyrus 就係Dusk Burrow 之後回到原點，係遺跡之中得到知識同埋前人既警語。Hornburg 大概只係建立左兩百年，但係遺跡入面當年比Solomon 發現既古語可以追塑到更早之前，因為Beowolf 出現之前其實已經有幾個朝代既更替，佢自己更加係某國既皇子。

而家回頭一想，Beowolf 同Odin Crossford 千辛萬苦咁去搵龍石返來封門，甚至特登建立一個國家守住佢。最後得到咩結果？佢地既後代僅僅比一個傭兵團搞到國破家亡，甚至最後成功既原因只係Erhardt 被Werner 誤導，嫁禍比國家。另一個就落得妻亡子散，甚至變成怪物既下場……..忠良之後呀……..

雖然Werner 已經冇再理Lyblac 既陰謀，反正Hornburg 已破，想開門咪隨你囉，Olberic 只係報左仇啫，但係Cyrus 就重要啲，佢阻止左後人再用From the Far Reaches of Hell 既知識來開門。

其三係黑曜會線，Primrose 既父親當然係黑曜會成員殺死架啦，Therion 要去搵既龍石都係當年黑曜會偷左去，再輾轉落入其他人手中。

其實黑曜會既成員，尤其係Simeon 同埋守衞隊長，冇可能唔知斬草要除根呢個道理。Primrose 仲要唔係父親被謀殺果下即時走添，根本大把時間落手。我不得不說，Simeon 雖然係一個痴線既陰謀家，但係佢對黑曜會既非法勾當，甚至乎係Gate of Finis，邪神之力等等根本唔當係一回事。

佢既心仍然，永遠只有Primrose。係佢既劇本入面，Simeon 同Primrose 係一齊幸褔快樂咁生活落去。但係現實之中，佢果種對於悲劇有如沉迷一般既渴望，驅使佢破壞Primrose 既一切，而又特登唔殺佢。當佢歷盡風塵，以女英雄既姿態回歸復仇既時候，冇咩比起令佢發現自己既初戀就係殺父仇人呢個事實更有戲劇張力，更加……峰迴路轉

Simeon 一生唯一既期昐，就係呢齣悲劇既實現，就算最後死於一生所愛既刀下，都唔會後悔…..唔係，佢最期昐既就係死於Primrose 刀下！

「既然佢地都青梅竹馬，互相相愛，做咩Simeon 係都要搞咁多野呢？」可能你會問。

咁佢痴線架嘛，痴線既野你同我識條鐵咩！

其四係邪神力量線，Hann’it 要殺既Red Eye 同Ophilia 既家事都係來自黑曜會利用暗黑勢力既後果。

其實主教根本就唔係病，Mattias 儲心積累左咁耐去毒死主教，為既就係令到傳火者Lianna 感到痛苦。因為呢個火種同一般中世紀故事既迷信唔同，原始火種係呢個世界真係保護緊呢片大陸免受邪神入侵，所以要召喚邪神除左需要Crossford 血統之外，仲需要火種由希望信仰之火，變成痛苦絕望既火。

當然，Ophilia 私自去左做傳火者已經打亂哂Mattias 既全盤計劃。經過一番波折之後Ophilia 起碼說服到Lianna 唔好重覆當日Graham 既錯誤。其實就召喚邪神回歸來講，八個角色入面係得Ophilia 有做過野。

當然，即使所有計劃都比八個主角搞亂哂，Lyblac 都唔會放棄。上一次Graham 雖然召唔到邪神，但門已經開左，龍石對佢來講已經冇用。今次佢亦都重施故技，對Graham 個仔下毒手，再次用重遇家人來做利誘，叫佢做祭品召喚邪神。

Kit 其實早就出現過，每個主角過左自己既第一章都一定會見到佢。時代更替依然，但係Lyblac 既陰謀始終未變，每個主角都一定會見到既又點會係普通人呢，Kit 就係呢個時代既祭品。

最終主角們打敗左以Kit 為祭品召出既邪神，救返佢，然後又繼當年Beowolf 同Odin Crossford 之後，成為呢一個世代拯救世界既人。

或者下一個世代，主角唔夠打既時候，聖火神會再次降臨，又或者其他神祇仍然未療好傷，咁呢個世界就玩完。今次既危機雖然已經化解，但係門仍然存在，龍石仍然存在，Kit 仍然存在，Dusk Burrow 既遺跡仍然存在。只要過多一百幾十年，主角死哂之後，根本就唔會有人阻止到第二個Solomon 再去寫From the Far Reaches of Hell，偷龍石之後再開門。長生不老同邪神之力永遠都係咁誘人，世界每分每秒都係危難之中。唯有真正既聖火，以信仰同希望既力量，一代一代傳承下去，保護呢一片大陸。

May the flame guides your path.