從來都好少喺呢度提樂拼呢間野，老實說說就係提都無謂，講多就變相幫佢提多次比人知。但近來見不同嘅媒體都爭相報導一件事而有啲野想大家睇清楚。唔好見話樂拼要賠錢就大快人心，當中判決之後所得到嘅賠償同結果係咪如大家所知一樣？

表明第一樣重點，LEGO 係 2016 年喺中國法院提控，而根據嚟自 customizeminifiguresintelligence 喺 8 月 30 號所出嘅 一篇”LEPIN Defeated in LEGO Lawsuit, 15 million Yuan Damage and Unrepentant“內容中見到（2017）粵民轄終367號表決喺 2017 年 7 月已經有結果，但只係今年 7 月先公佈。當中整整一年時間大家有冇睇到當中有冇改變過，大家應該心中有數。

第二點係由 2010 年 LEGO 似中國注冊商標到 2012 年批准，但因為同一間 09 注冊嘅眼鏡公司同名而喺商標注冊上訴訟。一直到 2017 年 7 月北京市第一中級人民法院先有定案將 LEGO 定為「知名 (well-known)」，而同年 11 月 LEGO 官方出過一份消息就係講到關於呢個判決，但同一個月有關樂拼嘅賠償就竟然冇提及過。

第三點係先定義嚟自 customizeminifiguresintelligence 內容全無作假，而當中大家著眼於判令及賠償就只有呢 7 點。

1. 被告立即停止侵犯原告的註冊商標專用權，包括其第10176429號、第135134號、第75682號、第206918號、第10176179號、第G869258號、第14150258號、第G1157118號商標。
2. 被告立即停止侵犯原告的未註冊馳名商標“NexoKnights”的專用權。
3. 被告立即停止一切不正當競爭行為，包括：1、停止將與“LEGO”、“樂高”相同或者相近似的“LEPIN”、“樂拼”作為商號予以使用。 2、停止將與“NINJAGO”、“CHIMA”、“NexoKnights”相同或者相近似的“NINGJAG”、“CHIMO”、“NexuKnights”作為商品名稱予以使用。
4. 被告刪除並停止通過微信和QQ等媒介發布侵權產品信息及其他侵害原告商標專用權或者涉及不正當競爭行為的內容。
5. 被告在中國玩具和嬰童用品協會的官方中文網站 //www.wjyt-china.org/ 和廣東省玩具協會的官方網站的顯著位置刊登聲明，消除侵權影響，聲明的內容由法院批准，費用由被告承擔。
6. 各被告連帶賠償原告人民幣1500萬元。
7. 被告承擔本案全部訴訟費用。

第 1-4 點，大家睇睇上面呢張圖可能就了解到其實只需要改變個包裝同用字，基本上就可以通行。第 5 點大家只要上過去兩個網站就可以發現亦無相關聲明出現過。而當中大家覺得 LEGO 賺返嘅人民幣 1500 萬元同訴訟費，其實有冇就真係唔知。

咁多未知數同未有實際行動，如果判決係一年前，又點解好似無發生過一樣？市面上繼續充斥住大量嘅樂拼生產貨品，如果真係判決完成，應該唔係改左系列名就過到關，咁當中係咩問題？

喺裁決書入面見到被控兩間公司提出嘅管轄權異議被用到《中華人民共和國民事訴訟法》第一百二十七條第一款否決，第一百二十七條其實係講緊人民法院受理案件後，當事人對管轄權有異議的，應當在提交答辯狀期間提出。人民法院對當事人提出的異議，應當審查。異議成立的，裁定將案件移送有管轄權的人民法院；異議不成立的，裁定駁回。（2017）粵民轄終367號呢份裁定書其實係駁回兩間被控公司要求將案件轉移去汕頭市呢個申請！

廣州知識產權法院(2016)粵73民初1692號案件先係LEGO同樂拼之間嘅訴訟，而事件係發展當中定係審完未有定案就唔肯定，但最少知道未有呢份判決書公開！

事件當中只係比大家知道控方 LEGO 嘅 7 點判令同賠償金額，但實際係點都仲未有定論，不過只係賠償千五萬人仔加訴訟費，對一個嚴重侵權行為嘅得益只係九牛一毛。事態最終發展成點，對大家都只係花生一粒，但呢件以訛傳訛簡繁翻譯之誤(笑)嘅事令大家以為勝訴而空歡喜的話，就真係唔好意思啦！