唔知你有無玩《人中之龍 3 HD 版》？我早於 PS2 年代已經開始玩《人龍》系列，之但係咁，之前推出嘅《人中之龍 1～2 極》我都仲係玩得好開心，儘管劇本依舊，但遊戲當中加入不少新元素，系統亦有改善提昇，無論新舊玩家，應該都會玩得過癮。

喺正評之前，比我鬧左先。

當知道《人龍》3～5 代居然唔打算以「極」嘅方式推出時，我其實好失望，亦都有啲灰心 orz

一來，對於以前已經玩過舊作嘅玩家，如果遊戲只係 HD 化，其實真係無咩誘因喺 PS4（甚至 Pro）上面玩一隻「比 PS3 畫面叫好左少少啦」嘅移植遊戲。

二來，對於新玩家黎講，世嘉，喂呀，你用兩隻整得好好睇睇嘅《極 1～2》黎引人入坑，然後《3～5》居然要人玩返 PS3 質素嘅 HD 版就算，咁你一開始就唔好整個《極》嘅假像出黎令到一眾玩家有美麗幻想＋錯誤期待啊（掩面）

動畫畫質比 PS3 年代有明顯改善

不過，in-game 操作時嘅畫面同 NPC 就……（默）

雖然我有我嘅不滿，不過，我都要講句持平嘅說話嘅，如果唔講畫質、唔講系統上面嘅缺點，《人龍 3》嘅劇本、支線、笑點，都仲係有佢嘅吸引力喺度的。

由於當年已經玩過兩次，今次呢隻 HD 版我主力衝主線為主，未玩過嘅朋友唔駛擔心，呢篇感想無劇透的，我主要都係藉遊戲懷愐過去常陶醉，愛在回憶中找你而已。

《人龍 3》嘅時代係 2009 年嘅日本，以當年嘅技術黎講，官方其實都好用心架啦，至少我當年玩得好開心 LOL 我而家嬲，係嬲佢無誠意唔出《極》啫，哼哼。不過，雖然以前都已經見過，但係九年後嘅今日，我再次喺遊戲裡面見到呢個畫面，都仲係笑左出聲。

2009 年，全亞洲包括日本在內都瘋狂地沉迷緊韓劇《冬日戀曲》嘅裴勇俊……連遊戲中嘅大媽都唔例外 LOL

「李幻尹」好似係裴勇俊於劇中嘅角色名（化名）

另一方面，桐生大叔自從《2》代聲稱自己金盤洗手之後，接下來嘅幾集，佢都做過唔同嘅職業；今次第三代佢就做湊仔公，但係支線都有好多搞笑野要做，例如無啦啦要幫間夜總會捧紅一個新女公關（相信係水商售經營任務嘅前身）、亦會無啦啦要幫麵店送外賣等等。

湊仔公：當年我玩《3》，頭幾章我都幾無耐性，因為成日要湊呢班細路真係好煩 orz

典型日式送外賣 Play

《人龍》嘅好玩之處，就係佢嘅支線其實樂趣多過主線，主線通常都腥風血雨、鬼咁認真，但係支線就成日出現好多惡搞對白，特別係見到桐生一臉正經八百咁做 Kuso 野時的確幾好笑！不過，由於今次呢隻只係 HD 版，所以地圖上面並無做到「無縫」呢一點嘅進化，好多地方、樓梯都係唔行得、唔入得，當年玩唔覺得有問題呀，但係而家玩就覺得好似差左啲野咁。

見番唔少老面孔～

仲有呢對 NPC 煩膠 CP 支線LOL

不過，就算只係做 HD 化，有啲系統上面當年比玩家話「可以改善」嘅地方……結果黎到 HD 版都係無改到的，例如大家玩後期嘅《人龍》唱卡啦 OK 應該覺得好順暢，但係《3》嘅唱 K……我只能夠講，而家玩返舊版系統，啲節奏感真係好微妙 orz

仲有啲細節，例如去食飯但係無食物相、無桐生上演《孤獨的美食家》咁樣食比你睇、去食飯無得一次過食多過一種……呢啲都係當年玩覺得可以改嘅地方，而家再見返呢啲問題，我真係……好懷念吖！LOL

如果你問我呢隻《人龍 3 HD》值唔值得玩，對於新玩家黎講，當然仲係有樂趣喺度的，同埋起碼故事劇本對於你黎講係新鮮野生吖；不過，如果你係同我一樣嘅舊玩家，除非你有收集控啦（咁隻 Game 又真係唔貴），如果唔係，我相信你未必會為左波多野同埋桃乃木兩個女公關角色而對遊戲特別有期待吧？畢竟佢兩個以前都出過場啦！又唔係全新角色！唔好呃我！你話有得玩真島男公關就話啫！

雖然我身邊有未玩過舊作嘅朋友表示玩得幾開心……唔知呀，我係 Fans，愛之深責之切吖嘛 LOL