對《Dark Soul》系列有少少認識既都知道隻 Game 以難度見稱，遊戲內不但 Boss 非常強大，就連小怪都不能忽視，一唔小心隨時比小怪劈幾刀就係咁先。但係又有無諗過，如果掉返轉比你扮演遊戲內強大既 Boss，遊戲會唔會立即變無雙，瘋狂虐小怪呢？

最近外國一位 modder DATEHACKS 就係論壇 Reddit 發布咗幾條影片，內容就係佢製作緊既《Dark Soul 3》mod「Forces of Annihilation」，而呢個 mod 就係比玩家係遊戲內扮演強大既 Boss，基本既教宗沙力萬、深淵監視者、無名王者就梗係有得玩，連超大隻既巨人尤姆，甚至係黑龍都有得玩，真係非常之過癮！

「Forces of Annihilation」既然比得你用 Boss，就自然比你用埋佢啲招式，而且仲唔扣精力添！就咁睇似乎就真係變無雙咁，但係其實唔洗擔心，雖然比你用 Boss，不過傷害都經過調整，攻擊力普遍都偏低，純粹比大家體驗一下 Boss 既招式係幾咁霸道同埋佢對我地果陣係幾咁仁慈。

呢個 mod 就未正式出街，但係 DATEHACKS 係影片入面都有講到工作進度，並且話好快會正式見街，有興趣既朋友要留意啦！（順帶一提 DATEHACKS 亦都做過一代既用 Boss mod，覺得佢個名熟口熟面絕對唔出奇）