自從《PUBG》掀起咗食雞熱潮之後，差唔多間間廠都出返大逃殺類型遊戲又或者加個食雞 Mode，不過絕大部份都係換湯不換藥，睇落去到幾悶。黎緊就有隻叫做《King Tide: Aquatic Royale》（潮汐之王），雖然都係大逃殺，不過就唔再係跳傘，而係跳海，因為呢隻遊戲既地圖就係深海！

《潮汐之王》由 Digital Confectioners 製作，佢地之前出過一隻多人生存遊戲《Depth》，而且仲係 Steam 度得到「極度好評」。而《潮汐之王》除咗係深海進行大逃殺之外，仲加入海入面強大既捕獵者「鯊魚」，亦即係話呢隻遊戲會同時有 PVE 及 PVP 元素。

《潮汐之王》同樣最大同場人數為一百人，比賽開始後玩家都係要周圍搵裝備，不過場景就變為沉船、廢棄實驗室、珊瑚礁等等地方搵野。而且大家係海中除咗面對敵對玩家追殺之外，仲要應付黎自鯊魚、深水炸彈等等危機，大大增加 PVE 元素，呢點同之前我地介紹過以核災難做主題既大逃殺遊戲《Fear The Wolves》相似。

《潮汐之王》將於今年 8 月係 Steam 度進行付費搶先體驗公測，至於正式版就要去到下年既 7 月推出，支援繁體中文。

《King Tide: Aquatic Royale》Steam 傳送門