如果你同我一樣鍾意玩經營系遊戲，今次介紹呢隻《Happy Sandwich Cafe》一定啱你心水；遊戲由 nicobit 工作室開發，雖然就唔算係新 Game，但係好玩嘅遊戲無分時間性架嘛～

遊戲主題同個名一樣，你係一個麵包師傅，經營一間細細的三文治 Cafe，而遊戲玩法就係需要你配搭出唔同口味嘅三文治去賺錢；所謂口味亦即係三文治嘅配料，呢個遊戲喺「材料」呢方面做得好真實架，材料嘅配搭真係你要問心食得落口先叫好味道！

一開頭嘅材料就好易拎到嘅

但係你到底可以夾幾多層嘅三文治，就需要推 Level 黎解鎖了

同時，因為遊戲入面啲 NPC 各自口味唔一樣，所以要滿足幾種人口（男女、成年人、老人家、小朋友）各自嘅喜好、從而喺經營中賺到最盡，就好睇你花幾多心機試整新口味三文治了。

長按 NPC 可以見到佢地對材料嘅喜好

隨住你嘅 Level 越高，就會出現新嘅「三文治比賽」以及其他「材料供應商」支線出黎，你必須要做出高評價同埋合佢地要求嘅三文治，先能夠解鎖新嘅麵包 Recipe、材料以及調味料；你唔好睇遊戲啲畫風好似圓圓笨笨咁，其實啲 NPC 要求好鬼高，要完成啲支線都唔易架。

你有心機嘅可以好似我咁幫三文治改名添 LOL

呢個遊戲基本上真係唔知幾時先見到終點，因為一路玩，就一路開新支線，賺到錢又可以 Upgrade 間舖變靚啲，一方面又要投資開發周遭地域去增加人流！同時，你仲要不斷改良舖頭入面嘅工具令到生意運作更順利……

所以我先話呢個 Game 好中毒 orz

解新素材支線

夠 Level 就可以將店舖升級

做生意真係樣樣都係錢……

《Happy Sandwich Cafe》基本上免費遊玩，如果想拎遊戲中嘅 Ticket 都可以睇 20 秒廣告免費拎，所以係超抵玩的；又或者咁講，正因為佢無得比你課金狂買野，所以升級呀、買器材呀，就真係要靠賣三文治慢慢儲錢了。

遊戲中可以使用嘅三文治素材極多，多過 Subway（喂），要點樣配搭先整得出色香味俱全嘅三文治，亦係遊戲中令人上癮嘅地方。

呢個 Game 已經喺 iOS 以及 Android 上面推出，遊戲有日文及英文版的，鍾意玩經營 Game 嘅朋友不妨考慮吓吖～

遊戲介紹影片如下：

【iOS 版下載】
【Android 版下載】