LEGO 創作者好多時候都收埋收埋好多諗頭，到諗通左一啲製作上嘅困難，之後就會爆發晒出嚟，嚇你一跳。本地創作者 Zeta (BricktheWall) 向來都砌開機械人啊機甲類作品，不過最近就開始將一啲舊系統再改良，做左套 BTW-Frame 3.0 嘅機械人骨架喺 JBF2018 當中展出。

喺 JBF 同一眾嘅創作者交流之後，決定將一件未完成嘅作品再重新拎出嚟修正，結果就有以下嘅新作品登場！

Liger Antithesis by Evirob Zeta aka BricktheWall

就咁睇嘅話，好多朋友都以為個靈感嚟自《GaoGaiGar》嘅 Galeon 呢，「Galeon 嘅變型唔同架，佢獅子形態嘅話駕駛員會面向天架！」Zeta 呢句令我明白到有啲執著你放棄左，件作品就唔會有好嘅效果。
 據 Zeta 所講，其實 Liger Antithesis 嘅設計概念係嚟自兩本同人誌作品，分別係《Gundam Beast》以及《T-BEAST》，再加多少少《索斯機械獸》嘅感覺。

《Gundam Beast》

《T-BEAST》

不過砌開機械人嘅 Zeta 今次就比個獅子頭難到，原來隻獅子頭由獸形變人形嘅時候係會收一部份入機械人內部，咁就可以唔會令人形嘅時候獅子頭變得太大，而獸形嘅時候又有返條頸。

雖然大家都覺得近乎完美，但對創作者又點會咁睇，「其實整個設計我覺得還可以修再改一下，其實最終係想將駕駛倉喺獸形嘅時候轉出嚟好似《新魔神英雄傳》虎王駕駛新星邪虎丸咁嘅效果，但係現階段嘅 size 仲係未得…」

不過見上年同另一個 LEGO 創作團隊 Brick Mech Avengers所創作嘅 Eagle Fighter「鷹戰機」，佢所想嘅駕駛效果應該唔係難度，可能只係創作時間上嘅問題。

Evirob Zeta aka BricktheWall 作品 Facebook Page 傳送門