每年夏季日本各廠商都會推出唔同玩法嘅恐怖類遊戲，今次同大家介紹呢隻《Disease》係一隻探索解謎型嘅遊戲，預計 2018 年 7 月 5 日上架，Switch 平台獨佔，目前對應日文及英文版，中文化消息有待公佈。

遊戲基本操作有少少似《逆轉裁判》，只不過你嘅身份係醫生而唔係律師，亦都唔駛上法庭，亦都無得搞 Gag……你有嘅，就係點樣喺呢間廢棄醫院入面完成你嘅工作！

故事背景係講主角本身係醫生，但係因為有精神問題，經常見到幻覺，所以無法再執業；而堅稱自己無病嘅主角，為咗可以做返醫生，走去求自己前上司「有無計呀喂？」咁樣。

不過，我極度懷疑個前上司同主角有仇口，因為前上司交比主角嘅任務，居然係要你自己一個人去間廢棄核突醫院入面，搵返一啲唔見咗嘅「醫療用品」同埋「資料」……

講真，就算無精神問題，入到呢間醫院應該都會驚到痴線；主角都一樣，雖然覺得自己無病，但係，入到醫院之後不斷見到嘅奇怪場景，主角已經分唔清眼前到底係現實，抑或自己真係見到幻覺。

明明應該係咁

望望下又變成咁

佢家下黃色衫（誤）

又變返綠色衫（大誤）

OK，Sorry，上面兩張圖嘅 Caption 純粹係我想調劑下啲恐怖氣氛。玩法方面，主角必須穿梭於兩種變化場景當中，搵出解開謎題嘅線索，雖然隨住故事推進，你個心越變得不安……

不過遊戲有治癒點的，大家喺圖中見到嘅黑貓，就係你進入醫院之後就跟住你嘅「拍檔」；如果你有朋友同你一齊玩，遊戲其實支援 2P 架，朋友可以做隻貓做隻狗不做情人，作為貓嘅玩家，可以幫助主角去一啲高處或者暗縫搵出道具或線索。

遊戲售價為 800 日元，有興趣嘅朋友可以參考以下呢條 Trailer，不過小心音量呀～