From Software 除咗尋日公佈嘅《Sekiro: Shadows Die Twice》之外，今日亦為玩家帶黎新驚喜，工作室將首次開發 PSVR 歷險遊戲《Déraciné》，預計 2018 年內發售。

《Déraciné》由 Sony Entertainment 旗下 Japan Studio 聯同 From Software 共同開發，製作班底係《Bloodborne》團隊嘅宮崎英高先生，所以成條公開片段都充滿住濃厚古典優雅嘅味道！基本上佢未公佈班底，我都已經諗起 From Software 了（笑）

遊戲目的係想以 PSVR 嘅技術，帶比玩家一個古典校園探險嘅經驗。故事背景係喺一間鄉郊嘅寄宿學校入面，總共有六位少年少女嘅學生，以及年老嘅校長。玩家嘅身份係其中一位少女喚來嘅妖精，人類肉眼睇你唔到，但你可以干涉或接觸佢地黎顯示自己嘅存在。

遊戲名「Déraciné」係法文，意思係「無根的草」或者係「流浪者」之類嘅意思，或者亦暗示左玩家就算同班學生建立牽絆，但係呢度都唔係你容身之所。

雖然宮崎英高先生話《Déraciné》係一個溫柔嘅故事，不過，呢個遊戲係兒童不宜的，即係話點都唔會係合家歡劇本（笑）始終係 From Software 出品，相信劇本點都係會有少少 Dark……我而家嘅苦惱係：我是咪應該為咗呢個遊戲買 PSVR 呢？