呢隻由獨立遊戲工作室「11 bit studios」製作嘅《Moonlighter》其實於 5 月 29 日已經喺 Steam／PS4／Xbox One 上面先行上市，Switch 版就應該呢段時間會推出，由於 PS4 同 Steam 版都有中文版，所以預計 Switch 版都會有中文化 Patch……相信會係唔少玩家嘅好消息。

咁呢個遊戲玩咩呢？玩家飾演嘅主角生活喺小城鎮入面，經營住一間武器道具店，呢間舖頭由於係家族生意，所以你好想將佢發揚光大（有家業唔駛打人工，好似好幸福啊）

而喺舖頭附近，有一處遺跡，遺跡入面有唔少素材同珍寶，但同時有好多魔物潛伏；所以玩家同時需要不斷打地城黎刷資源去 Upgrade 自己以及舖頭嘅貨品種類。

就咁聽好似好簡單係咪？不過呢個遊戲都好需要玩家用腦的，一來由地城可以帶返黎嘅素材有數量限制，你要點樣取捨呢？拎返黎係賣哂佢換錢，定還是作為升級用呢？每日時間有限，你又會點分配你嘅時間呢？

除此之外，生活喺城鎮當中，與其他住人建立良好關係都好重要，所以遊戲中嘅支線，可能就係要幫佢地達成需求（打怪或者製作某啲道具），如果玩家叻仔，你唔單止可以擴展自己家族業務，仲可以令村莊繁榮起黎！

雖然係小品遊戲，不過遊戲中的畫面以及音效都不馬虎，玩法亦多樣，有興趣嘅玩家不妨睇埋下面條片參考下。Steam 上面遊戲售價為 HKD 89，預計 PS4 及 Switch 實體版會貴少少。