今年年頭嘅時候，我地同大家介紹過《Harry Potter：Hogwarts Mystery》呢隻手機遊戲，呢個 Game 前排上咗架啦，但係，因為畫質實在太令人……無言嘅關係，結果我極速棄咗 Game 了。

外國方面對於呢個 Game 嘅負面聲音都好多，但就唔係針對佢嘅畫質，而係鬧緊個 Game 逼人課金逼到一個唔合理嘅地步，喺 Twitter 上面簡直係一片炎上，令到遊戲玩家人數大減，咁到底個 Game 衰乜呢？

遊戲行「體力」制，即係你做任何活動、任務都需要消耗體力，而遊戲入面嘅體力，如果你要自然回復嘅話，速度係奇慢的；但係同時，於遊戲中進行 Action 嘅體力消耗就奇高，換句話講，你儲滿體力入 Game 可能玩一個任務已經無得再玩落去了！

右上角為體力值

可能你會話：玩手機 Game 課金是禮貌，呢一點我認同呀，遇到好遊戲我亦會毫不猶豫地課金的，但係比錢都要比得合理，問題係而家唔合理噃！

到底幾唔合理？例如遊戲中呢個任務，需要玩家不斷消耗體力先可以完成；但係，頭先咪講咗體力回復超慢嘅？如果唔夠體力的話，你就只可以乾等、等個任務自己完，如果超時任務仲會當失敗添！真係聽到都覺得超無癮，大家不如又睇下如果唔課金嘅話，要幾耐先可以填返滿條體力 Bar？

答案係 7 小時 50 分鐘呀！喂，就算我當掛機 Game 咁玩，都無理由要玩家掛同一畫面掛 7 個鐘啩？咁樣玩家仲邊有心機玩落去呢？大家一齊睇下外國啲玩家點講：

I see I’m not the only person to have screenshotted Harry Potter: Hogwarts Mystery’s “pay up or continue to be strangled” moment
(thx, @ShaunJonTheDon @purrsneakitty) Any more? pic.twitter.com/ITvAHsN6CD

— Tom Phillips (@tomphillipsEG) April 30, 2018

以上呢個半強制課金嘅遊戲系統，最近唔止喺 Twitter，連喺 IGN 同埋 Reddit 都引起討論，好可惜遊戲開發商目前似乎扮聽唔到呢啲意見，所以已經棄 Game 嘅玩家都紛紛表示好失望吖！

咁又係呀，《Harry Potter》明明係老少咸宜嘅作品，裡面承載著唔少朋友嘅青春夢想同回憶，你出個遊戲搞到咁鬼核突（仲要咁鬼現實），我諗我都唔會再有力氣重新開 Game 了～