大家以往玩開嘅偶像主題遊戲，通常都係音樂 Game、或者係好感育成遊戲，今次同大家介紹呢隻《Idol Manager》嘅性質就有少少唔同！遊戲重點唔係為咗捧紅啲女仔，唔講理想，而係非常現實地講到明「一切都係為咗賺錢」！

《Idol Manager》由獨立遊戲工作室「Kuiper」開發，早前放上 Kickstarter 集資，因為遊戲題材吸引，吸引大量人比錢贊助；遊戲原定 2018 年落 Steam（PC/Mac/Linux），而家資金達到目標，工作室宣佈 2019 年會將遊戲落埋 Switch！

既然唔係音 Game 又唔係育成，咁遊戲到底玩乜？玩法同遊戲名完全一樣，玩家飾演嘅，就係「偶像經理人」，一方面要幫班女女接 Job、要幫佢地趕絕緋聞、要幫佢地拆解啲公關災難；一方面仲要湊女，假如佢地心情唔好、壓力大、抑鬱唔開心……作為經理人嘅你都要一一照顧。

我個人就幾鍾意遊戲文案嘅意念：咁努力捧佢地，唔係因為你鍾意班女呀，只因為佢地係你嘅生財工具咋！LOL

要管理佢地行程同埋 Training

接廣告可以諗條件

日常營運畫面

遊戲入面嘅「偶像」們各有性格，佢地都有鍾意以及討厭嘅工作，而每件工作都會有利有幣，有啲賺到錢、但會破壞偶像形象。到底你要用邊種方式去捧紅一個人，就真係按君喜好了～

遊戲另一個樂趣係：故事背景係參考日本而家嘅偶像業界去創作的，所以如果你本身對日本藝能界有少少留意，或者會對於遊戲中出現嘅「事件」安排感到似曾相識 LOL

「欅坂46」2016 年穿上類似納粹軍服嘅衫表演，而造成國際網路炎上呢件事大家仲記唔記得？LOL

目前我係非常期待呢個遊戲的，因為自從《明星志願》之後，都好似好少機會玩到經營系嘅偶像遊戲。呢隻《Idol Manager》望落一啲都唔易玩，不過似乎玩家唔同嘅選擇，都會好影響到故事嘅結局，呢種開放 Options 嘅遊戲一向好襟玩呢（笑）

要成為有錢經理人絕對唔容易～LOL

旗下偶像以勝出總選舉（？）為目標！

玩法 demo

遊戲對應語言為日文及英文，比大家睇下遊戲 Trailer 先：