大家仲記唔記得早2年，有隻包含咗跑酷元素，叫《Dying Light》既開放世界喪屍 Game，當年都紅過一排。最近呢隻遊戲就正式公布係今年內會有大 DLC，而呢個叫做「Bad Blood」既 DLC 主要就係玩新既大逃殺模式！係時間要搵返隻 Game 出黎啦！

係新模式「Bad Blood」入面雖然係有得玩大逃殺，不過就唔好諗住係 PUBG 咁成百人對決，佢容許最大六名玩家同時遊玩，呢六名玩家將會空降係地圖隨機位置。同一般大逃殺遊戲一樣，一開始當然係周圍搵武器以及道具先，然後就可以搵你既目標「特殊感染者」。

一落地搵武器先是常識吧

目標「特殊感染者」

不過講得係大逃殺遊戲就梗係可以 PVP，當你打「特殊感染者」隨時會撞到其他玩家，呢個時候打人先定打喪屍先就要諗諗啦！

有特殊感染者又有敵對玩家在場，打邊個先呢？

當擊敗「特殊感染者」之後就可以採集樣本，仲會得到技能點去提升你既生命、敏捷度及攻擊力。遊戲勝利條件就係採集夠指定數量既樣本，之後仲要順利登上救援直升機先叫成功，然後架直升機得一個位。即係話落後既玩家可以聯合埋一齊去殺第一位玩家，真正既未上到機都未知邊個贏！

直升機場大亂鬥！

《Dying Light Bad Blood》會係 2018年正式推出，對應平台為 PlayStation 4、Xbox One、PC。

有興趣可以睇下外媒 GameSpot 既片段：