根據非正式統計有大約十五萬人因為《MHW》而成為機主，而係不知不覺間大家都屠咗成個月龍，都開始覺得悶悶地想搵下其他 Game玩，我地都收到好多讀者問「喂 PS4 有乜 Game好玩阿？」，所以我地編輯部特別揀咗十隻 PS4 機主必玩遊戲比大家！
劇情重視射擊類
《The Last of Us Remastered》
雖然已經出咗好一段時間，遊戲背景係末日之後既美國，2位主角大叔 Joel 同埋蘿莉 Ellie 係怪物橫生既世界內相互扶持作戰既求生故事。整體劇情緊張刺激得黎又不失細膩既情感表達，實屬佳品。
至於戰鬥方面就屬於第三身射擊遊戲，當中特別著重「聽覺」呢個元素，射擊及打擊感優秀，而且盛傳續作《The Last of Us Part 2》會係今年內會推出，作為機主絕對不容錯過！
(記得買 Remastered 版本，包晒 DLC的）
《Uncharted 4》
同《The Last of Us》相似，不過《Uncharted》系列比較著重於解謎部份，遊戲故事就主力係講尋寶探祕，當然敵人就唔再係怪物而係懷有各種目的既人類，玩完唔夠的話仲可以玩埋後續作品《Uncharted the Lost Legacy》同埋《Uncharted 1-3合集》。加上本作以及《Uncharted the Lost Legacy》都支援 PS4 Pro 4K畫面輸出，真係拎黎試機都得！
《Uncharted the Lost Legacy》遊戲評測傳送門
動作遊戲
《Horizon Zero Dawn》
屬於開放世界式探索動作遊戲，遊戲背景講述世界上充滿大量巨型機械生物，渺小人類生存既故事。背景設定雖然好吸引，但係遊戲係故事劇情上就表達得比較弱。不過呢隻遊戲既重點係在於佢既戰鬥系統，同《MHW》狩獵一樣都係要睇清楚敵人既動作再作出反擊，而且班對手隻隻都好似索斯機械獸咁型，唯一可惜既係呢隻遊戲只限單人遊玩，但依然無損佢既可玩性。（此遊戲支援 PS4 4K）
《蝙蝠俠：阿卡漢騎士》 （Batman: Arkham Knight）
編輯部一致認為 PS4 上最出色既動作遊戲，就算唔係 Fans 都絕對值得一玩！遊戲貫徹蝙蝠俠暗中殺敵既手法，但係亦都不乏大堆頭一對幾十人既戰鬥，打擊感優秀之餘亦有極豐富既解謎、探索、收集元素，而且今集既蝙蝠車除咗可以變成坦克之外仲會有戰車對戰，唔想打交的話係城市入面飛車又得，想挑戰自我既亦有高難度特殊賽道挑戰，撇除無中文版呢個因素，簡直堪稱完美既作品。
(記得買年度版，包晒 DLC的，而且DLC極為高質）
《人中之龍 極》
扮演日本黑道人物「桐生一馬」，可以係日本街道自由移動既動作遊戲。採用即時制戰鬥，可以赤手空拳戰鬥又或者周街執野打人，隨手拎起架單車掉人係家常便飯，另外仲有大量有趣小遊戲玩。當然每集都會出現真實存在既 AV 女優亦係一大賣點，《人中之龍 極》作為系統作既首部曲絕對係入坑良品。
（當然亦都可以選擇 3月8日推出既《人中北斗》）
《Assassin’s Creed Origins》（刺客教條：起源）
刺客教條系列相信就算唔係機迷都會聽過，今集《Assassin’s Creed Origins》係廠方調整路線之後重新推出既作品，除咗變成開放世界之外，仲加入咗同廠其他遊戲既經驗落去，屬於集各家大成之作，而且遊戲支線任務極多，耐玩性一流！
《Assassin’s Creed Origins》遊戲評測傳送門
角色扮演類
《FINAL FANTASY XV》（最終幻想XV）
新一代既《FINAL FANTASY XV》可以話係現階段最靚畫面既 RPG 遊戲，雖然故事橋段麻麻但係勝在其他部份做得非常出色。同樣地係開放世界，大家可以選擇坐車又或者騎陸行鳥四處遊歷。遊戲特色之一係戰鬥畫面係同場景無縫接合，戰鬥係唔會有 Loading 畫面的。當然戰鬥系統亦都係即時戰鬥，唔好以為仲係十代前果啲回合制阿！
有興趣入手既朋友可以選擇啱啱上市既《FINAL FANTASY XV Royal Edition》，包晒所有 DLC 之外有新地圖玩，不過要有心理準備遊戲入面處處都流露住濃濃既男子漢味道，可能女性玩家比較受落。
《女神異聞錄 5》（Persona 5）
《女神異聞錄 5》一隻無論係音樂、劇情、美術、戰鬥系統等等都屬於一流之作。而且外國業界仲評價呢隻遊戲為「有史以來最偉大的RPG之一」，媒體一致比接近滿分既評價，仲係 2017年「Global Game Awards 2017」得到「最佳角色扮演遊戲」，又有埋中文版，要講真係有排講，不如直接睇下我地既相關文章啦！
恐怖遊戲類
《Bioharzard 7》（生化危機 7）
雖然 PS4 上面係有唔少恐怖 Game，不過講到可玩性、劇情緊湊程度、恐怖感等等就必定要推薦大家玩《Bioharzard 7》。今集雖然被評為最無 Bio味既一集，但係作為恐怖遊戲佢絕對屬於一等一既作品，難度適中唔會話好難玩，但係又唔會話易到好似玩無雙咁（其實無雙八當Kuso Game玩都ok好笑的），當中不乏需要動腦筋既謎題，而且遊戲仲有中文化，恐怖遊戲不二之選。
如果覺得一隻唔夠喉的話，《Evil Witnin 2》亦係唔錯既選擇，如果想挑戰打大佬的話可以選擇《Outlast 2》，不過小心嚇到瀨屎。
人人識玩看門口類
《Street Fighter V》
以前 PS3 年代大家都會準備定隻《Gundam Seed Destiny》宴客，不過黎都 PS4 既《Gundam Versus》就無得單機雙打，所以我地就揀另外一隻基本上人人都聽過，個個人都識 Chok 返二招既街霸新作《Street Fighter V》，阿龍阿Ken春麗呢啲大家都好熟架啦，而且買舊版的話應該一舊水左右有交易，買返隻黎看門口真係一流！
以上十隻雖然係必玩遊戲，但係好 Game 又點止得十隻呢，好似黎緊既《Detroit Become Human》、《The Way Out》、《超級機械人大戰X》、《Far Cry 5》、《God of War》等等，隻隻都係好野，不過作為新機主我地當然建議買晒上面果堆玩完先再算啦，話晒而家買好多都有二手點計都平啲嘛！
VJGamer總編，細細個已經蒲機舖，機齡甚深，熱愛電玩文化。