雖然唔想面對，不過《人中之龍》系列的確係告一段落了，接下來等緊大家嘅，係《人中北斗》呢個新企劃新遊戲！老老實實，我對肌肉漢子型嘅作品一向苦手，所以《北斗之拳》嘅故事我只係略知一二（故事主線同埋經典對白就一定會知的～），我並唔係一個死忠 Fans。

咁，喺我對《北斗之拳》興趣唔大嘅情況之下，呢隻主打「用人龍系統開發」嘅《人中北斗》又吸唔吸引到新玩家、又可唔可以留住《人龍》呢班舊玩家呢？

試玩版入面可以進行嘅劇情份量唔多（要你做一個任務咁樣），所以「劇本分配得好唔好」呢啲咁有深度嘅問題，就留返我玩完隻完全版之後再另寫感想吧（笑）

一入 Game 我有少少嚇一跳，拳四郎個人物模組線條，相當硬派 LOL ！個感覺就好似將漫畫入面嘅拳四郎剪出黎、變 3D、再貼落遊戲度咁，即係咁講：《人中之龍》嘅角色模組本身做得算係幾好啦，你唔好拎啲歐美 Game 呀、FF 系列黎比較就得架啦，係有時玩水商售啲女女 zoom 近鏡時會變成重度 Botox 症候群啫（喂）

我唔會用「靚」或「唔靚」黎形容呢種畫風，我反而覺得咁樣帶少少粗糙嘅畫風非常符合《人中北斗》嘅世界觀；問返你吖，如果拳四郎皮光肉滑係咪仲奇怪先？（笑）

不過，因為拳四郎嘅聲優仲係黑田祟矢、而黑田比我嘅印象已經等於桐生一馬嘅緣故，所以，明明我聽到嘅係桐生把聲，但畫面裡面嘅已經換成拳四郎，呢種感覺真係有少少複雜，相信《人龍》系列 Fans 玩呢個遊戲時都會同我有差唔多嘅感受。

「你們現在給我死在這裡！」LOL

場景方面，Demo 淨係可以行少少 Junk Street，以前《人龍》神室町好多嘢可以探索的，所以我都幾期待遊戲推出之後可以見到嘅「奇蹟之城伊甸」全貌。

《人龍》就話坐的士啫，《北斗》就要自己飛車啦！荒野飛車（？）可以收集到一啲零件道具，亦會遇上啲暴走族野盜。

今次「車」嘅改裝同埋改良係遊戲重點支線之一，而呢部車老老實實都唔易操控的，目前我仲係未掌握到個方向感……我自己一向對於要揸車嘅遊戲元素興趣不大，不過為咗玩完呢個遊戲，我到時會努力的 orz

荒野探索 Play

呢個試玩版嘅重頭戲，當然就係戰鬥啦！戰鬥方面，我認為唔好拎《人龍》黎同《北斗》比較優劣，無得咁比較的，因為兩者玩落都有幾大分別的。

首先《北斗》就講到明「忠於原著」，所以佢啲「奧義」全部都係漫畫裡面出現過嘅招式，如果係 Fans 嘅應該會好興奮！

啲招式多到…LOL

《北斗》戰鬥系統同《人龍》另一樣好唔同嘅嘢係：佢好多 QTE，多過《人龍》好多！加上拳四郎出招硬直頗耐，而群毆 Play 又無得話鎖定敵人咁樣架嘛，邊個衝埋黎就打邊個架喇嘛！

而且，唔知係咪因為我咩都未升級呢？硬係覺得拳四郎動作好重，又或者呢啲厚重嘅打擊感，就係《北斗》嘅特色啦（笑）簡單黎講，戰鬥模式真係無得 Hea 打，比《人龍》有難度噢。

升級模式似舊版《人龍》系統

公路群毆 Play

《人中北斗》繁中、日文版試玩 Demo 而家已經開放了喔！有興趣嘅玩家可以馬上下載黎感受一下；遊戲本體就即將於 2018年 3月 8 日 正式上市，到時一齊同我成為漢子稱霸伊甸吧～LOL