相信唔少獵人都玩到解放HR，但係發現傾落原來好多技巧同埋新加既道具用法都唔係好多人識，所以我地特別綜合咗十個比較實用既技巧同大家分享，務求令大家打獵打得更順！
更改設定令視角及操作更順手
快捷鍵操作設定
更改原設定之後，撳實 L1 再用右菇既使用方法將會改變。原設定類型1 就係撳實按住L1再用右菇選擇，放手就使用，不過缺點係成日會用錯道具。改成類型2之後按住L1再用右菇選擇之後需要再撳R3確定先會使用，穩陣好多。
改咗之後就唔會撳錯
自動納刀
原設定係拔刀狀態下進行移動無幾耐之後就會自動進行納刀，不過其實係一個幾麻煩既設定。建議係設定度改做「關閉」。
鎖定目標設定「只鎖定大型魔物」
預設既鎖定目標係會鎖定所有魔物，當同一個場地有好多小怪既時候不免會做成混亂。想避免呢個情況只要係設定度改成「只鎖定大型魔物」就可以。
目標關注設定
本身預設既鎖定方式係會長期 Lock住目標，有時遇著飛雷龍呢類會跳黎跳去既真係轉到你頭都暈埋，更改「目標關注的方式」為目標鏡頭就會變為按 L1 先會修正鏡頭為面向目標。
導蟲追蹤目標魔物可以自訂
今集係一個地圖裡面起碼都有三隻大魔物，但係好多時導蟲預設既魔物並唔係你既目標，係呢個時候只要用 Touch Pad 打開地圖再用R3標記目標魔物，標記後導蟲就會引導獵人至怪物身邊。（當然你要發現隻魔物又或者研究級數夠高啦）
左下角魔物名都可以用R3架
另外部份任務要求係打貓蜥龍、巨蜂呢類小魔物，同樣地只要用 Touch Pad 打開地圖再用R3標記目標魔物就可以，而且仲可以用 R1/R2 去設定地圖所顯示既項目添！當然地圖上面既採掘點、貓貓幫手等等都可以設置標記。
小至巨蜂呢類魔物都可以標記
使用捕獲網進行收集
《Monster Hunter：World》新增元素「捕獲網」，要使用「捕獲網」必需要先裝備係手弩，而呢個道具係出奇地好用！除咗可以走街捉d小型生物黎裝飾屋企之外，呢個網其實係可以用黎捉魚架！只要係一堆魚既地方用就可以一次捉多過一條，不過你用網捉完之後其他魚會嚇走晒，所以如果想捉多幾條的話都係用返魚竿逐條釣啦！
用網就可以一次捉幾條，不過之後會嚇走晒其他魚
其實大部份唔扣血既小型魔物都捉得
另外有玩過 MH 既朋友都知道好多時需要飛蚊呢類小型魔物既羽翼之類既素材，不過用武器打死的話就多數都會打散晒條屍，乜都無得挖！而用「捕獲網」擊中魔物都會有2-4左右既傷害，最重要既係用網打死魔物係會保留全屍！
騎乘中使用可使用手弩
就算騎乘中都可以使用手弩，可以零距離射毒飛刀麻飛刀又或者射石仔去侮辱下d龍，屬於耍帥技巧！
翼龍可以幫你趕路
只要你用石頭打d翼龍，佢就會靠近你，然後撳圓圈制就會捉住條龍，咁佢就會帶你去最近既大型魔物度啦！
拔刀狀態隨時隨地可磨刀
即使處於拔刀狀態，只要用撳實 R1 再用右菇選取砥石就會直接輪盤磨刀，而且磨好之後仲會繼續係持刀狀態，建議用上面既方法更改快捷鍵操作設定先。
自定清單幫你計算需求素材量
每次玩 MH 大家都會自己計住要整既裝備需求素材量，但係今集新增自定清單幫你計好晒要幾多素材，係超方便既新功能，可惜既係系統只可以儲穿一套清單。
先係工房生產/強化道具欄撳三角登錄到清單
然後撳R1就會見到所需要既素材總量
只要係 Option > 資訊 > 欲購清單就可以隨時Check住自己爭幾多料
報酬唔洗逐下撳！
完任務果陣報酬畫面咪要揀素材既，但係要逐下撳係咪非常之煩？其實只要撳實圓圈就可以極速搞掂架啦！
配合隱身衣裝輕鬆搬蛋
最受歡迎既搬蛋任務（DLLM）其實只要配合隱身衣裝就可以光明正大咁偷蛋，記得食埋貓飯發動搬運術。另外今集就算拎住隻蛋都可以碌同埋係一定高度跳落地而隻蛋又唔會爛，非常神奇。
每週任務幫你換稀有素材
每個星期都會更新每週任務，完成之後會得到豐厚報酬，好似今個星期完成週任就會得到金票卷，用呢張卷就可以換取各種龍玉！
係三人組度，第一個選項再撳R1 2下就會見到週任
全部完成就會得到報酬
再去神秘鍊金研究員度就可以換野
Price.com.hk 《魔物獵人 世界》中日英文合版價格查詢
回帶相關連結：
《Monster Hunter：World》2月份活動任務以及《Street Fighter V》阿龍裝任務詳情
【四十秒搞掂】《Monster Hunter：World》極速刷錢圖文攻略
《Monster Hunter：World》最易襯衫麒麟裝任務出現條件公開！
《Monster Hunter：World》全營地位置公開！
《Monster Hunter：World》全14種武器簡單介紹及出招表
《Monster Hunter：World》官方活動任務時間表
《Monster Hunter：World》PS4 vs PS4 Pro 畫面表現及流暢度比較！
重度魔物獵人中毒者，歷代遊玩時間破億分鐘！