自上季開始嘅 《Black Mirror (黑鏡)》轉投 Netflix 後，由基本一輯三集增加到六集一季。上季一出就被 Fans 投訴太荷里活化，冇左 英國 Channel 4 時期嘅蒼涼無助警世。不過第三季依然受歡迎，同時改變少少風格換得第 69 屆艾美獎最佳電視電影同最佳有限影集、電視電影或戲劇特輯編劇呢兩個榮譽，點都好過宋禮勤苦等三十年先捱到個男歌手金獎。

雖然好多朋友可能喺假期中經已追完今季，但為保持故事神秘感同懸疑性，我地都盡可能唔劇透！

自問由第一季追到依家第四季，每一季都仲有新驚喜，唔單只係劇情同驚慄感，而且探討嘅科技問題都不斷進步。由第一、二季所探討嘅資訊媒體、記憶、機械、複製人等等，到今季嘅生物電腦、量子電腦呢啲對大眾超複雜嘅題材，主創人Charlie Brooker 同眾導演扭橋、玩橋、主題深入淺出嘅程度真係去到一個神級領域。

而且今季你想要純粹嘅緊張驚嚇又有、懸疑警世又有、人性愛情亦有。你想要返第一、二季嘅英倫風情，今季又整返幾集你睇，你覺得荷里活式花巧啱口味嘅佢又有！而且 Charlie Brooker 繼續將佢對電子遊戲同毒L情義結，大量投放落今季嘅《USS Callister 聯邦星艦卡里斯特》。作為毒屬性嘅大家，睇下感唔感受到當中嘅迷思啦。

我就睇完都做左個今季喜愛度排名，唔知大家睇完之後又係點排呢六集呢？

1. 《USS Callister 聯邦星艦卡里斯特》
2. 《Hang the DJ》
3. 《Black Museum 暗黑博物館》
4. 《Crocodile 鱷魚》
5. 《Metalhead 金屬頭》
6. 《Arkangel 方舟天使》