呢隻 Game 出咗都接近一個月，作為系列作續集不但極鮮有網站評論，直頭連有得買既舖頭都唔係咁多。但係第一集推出之後因為遊戲完美融合卡牌探索、動作角色扮演以及砌 Deck 等元素而大穫好評，黎到今集可以講話比上集更出色，而家就為大家做詳盡剖析！

卡 Game 面動作 Game 底創新玩法

我收到隻 Game 果陣第一個反應係「吓又一隻卡 Game 阿？」，但係開機玩咗5分鐘之後就開始改觀，因為佢真身佢係一隻動作遊戲黎！遊戲用卡牌去講故事，每一步所選擇既牌都對應唔同既行動，有機會係戰鬥有機會係小遊戲甚至係交易，都幾似冒險型 Board Game。

每前進一步都會消耗1點食物，食物可以透過營地用金錢購買或事件取得

遭遇場地事件有機會會損失生命值，歸零就會 Game Over

每關開始前需要選定可以得到既裝備卡、事件卡等等

透過完成事件會得到Buff卡

人物設定就比較小選擇 （同埋風格太美式我就麻麻地）

非常獨特既講故事方式

唔似一般遊戲用影片又或者開頭就彈水蛇春咁長既字要你睇，遊戲採用每張獨立既卡牌黎講故事，每一張卡牌都會話比你聽進行緊啲咩事，例如女祭司章節就係要你收集六個祝福之後上山面對女祭司，當中會經歷暴風雪又或者糧食短缺時有人對你伸出援手咁，既不累贅又簡潔清晰，最對令你越玩越上癮！

每個事件都會延伸成多種結果

部份事件亦都有得選擇用咩形式應對

踩中暴風雪呢類事件就要硬食扣血

雖簡單但誠意十足既動作場面

遭遇戰鬥事件後會進入第三身視點戰鬥場景，基本系統同《Batman: Arkham Asylum》非常相似，都係主打反擊同迴避反擊咁，另外每把武器都會有專屬既必殺技，特效攻擊範圍唔同之外連儲力既需求都有分別。
每個場景最少有四名多則十幾名敵人，特別之處就係每關大佬都會有自己一套攻擊模式，配合非常細既場景其實都 OK 有難度的（相信係因為開發資金問題…….世界難撈丫）！

基本操作設置

戰鬥畫面

唔同武器都會有唔同既超必，個人覺得呢把紅衣主教之刃打範圍最好用

類似蝙蝠俠系列咁都係玩反擊迴避，應該唔會陌生

每關 Boss 都有自己攻擊招式、模式，而且 Boss 種類都唔少

極豐富小遊戲元素

當每次揀選前進卡牌路線時，有機會會遭遇進入小遊戲部份，最常見就係要擲骰仔，玩家需要擲出遊戲要求既點數，每次要求都唔同。另一種較常見就係輪盤抽牌，玩家需要係多張高速轉動既牌組入面抽中指定卡牌，每次失敗都會加入一張傷害卡，屬於高難度小遊戲。

最常見小遊戲擲骰仔

抽牌輪盤，圖中小遊戲係講緊入火場救人，所以目標就係要抽到村民

較少遇到既小遊戲，需要係光柱接觸銀板時撳停佢（二行障礙物及光柱都會不停移動）

總結

《Hand of Fate 2》雖然屬細廠出品既遊戲，但係好肯花心思係遊戲製作上面，淨係每張卡牌都會引申做唔同事件，每關又可以自訂事件、裝備、同伴卡牌等等，足見誠意。

另外值得讚既就係遊戲每個關卡都有大約一半係自訂構成，你可以選擇 6個機會都係得到武器裝備，所有事件靠武力完成；又或者全部選擇小遊戲構成，將一切交比運氣決定，連咁樣既玩法都可以實現，淨係呢種心思都值得大家去嘗試《Hand of Fate 2》，唯一可惜既就係遊戲並不支援繁體中文 （有日英簡中），但佢依然會係 2017年最被人 Underrate 之作，信我！